[caption id="attachment_53489" align="aligncenter" width="560"] inform.kz[/caption]
Бүгін Алматыдағы Есентай өзенінде, Тимириязев көшесінің төменгі жағында белгісіз адамның денесі табылған. Көп ұзамай ол Сафар Шәкеевтің мәйіті екені анықталды. Осыған байланысты Алматы қалалық ішкі істер департаментінде арнайы брифинг өткізілді, деп хабарлады inform.kz.
«Табылған мәйіттің іш киімі және шалбары болған. Қалтасынан әмиәні және құжаттары табылды. Сол арқылы оның Алматыда 16 шілдеде жоғалып кеткен Сафар Шәкеевтің денесі екені анықталды. Бұл аумақта сүңгуірлер бұған дейін талай рет іздеу жұмыстарын жүгізген болатын. Бірақ жиі болған нөсер жауындар толыққанды іздеу шарларын жүргізуге кедергі келтірді. Қазір, болжам бойынша, Сафар Шәкеевтің өлі денесі осы уақыт ішінде Есентай өзенінің баспалдақ тәрізді каскадтарының бірінің астында тіреліп, қалып қалған болуы мүмкін», – деп мәлімдеді қалалық ішкі істер департаментінің баспасөз хатшысы Салтанат Әзірбек.
Сонымен қатар, оның айтуынша, Есентай өзенінде белгісіз адамның денесі су бетіне қалқып шыққаны туралы алғашқы хабар бүгін шамамен 11.00- де келіп түскен. Сол мезетте сүңгуірлер айтылған жерге келіп, іздеу шараларын жүргізеді.
Бірақ өзенде су деңгейінің биіктігі және ағысының қаттылығы салдарынан денені бірден табу мүмкін болмаған.
«Қазір Сафар Шәкеевтің қандай себептен көз жұмғанын анықтау мақсатында тиісті сот-медициналық сараптамалар тағайындалды», - деді С. Әзірбек.
Естеріңізге сала кетелік, 16 шілде күні кешкі 22:00-де Медеу аудандық ішкі істер басқармасына 1991 жылы туған Сафар Шәкеевтің із-түссіз жоғалғаны жайлы арыз келіп түскен еді.
Содан бері белгілі композитор Еркеш Шәкеевтің ұлы Сафар Шәкеевті іздеу шарасына 170-тен астам адам қатысты.