Отандық тауар өндірушілерді қолдау үшін Алматы облысы әкімінің қаулысымен өңірлік комиссия құрылған еді. Оған облыс әкімінің орынбасары Серік Тұрдалиев пен облыстық кәсіпкерлер палатасының директоры Ләззат Шыңғысбаева тең төраға болып бекітілді. Мақсаты мемлекеттік органдар мен отандық тауар өндірушілердің сату-сатып алу мәселесіне қолдау көрсетіп, кәсіпкерлер қызметін үйлестіру, мемлекеттік сатып алудағы жергілікті құрам үлесін арттыру болып табылады.
Сонымен, аталған комиссияның жарты жылдықты қорытындылаған отырысында облыстық құрылыс басқармасы 66 байқау, энергетика және тұрғын үй-коммуналдық шаруашылық басқармасы 61 байқау өткізгені хабардар етіліп, кәсіпкерлерге мемлекеттік сатып алу жоспарын ұсынды. Сондай-ақ, кәсіпкерлердің де пікірлері мен ұсыныстары тыңдалды. Жобалық-сметалық құжаттардағы тариф мерзімінің өтіп кетуі өзекті мәселе болып тұр. Жобаны мақұлдауға, қаржыландыруға құжат әзірленгеннен кейін қаржы бөлу үрдісіне 1 жылдан 3 жылға дейін уақыт кететіндігі анықталды. Осы уақыт аралығында тауар мен қызмет көрсету бағаларының қымбаттап кететіндігі белгілі. Алайда, сатып алуды өткізу кезінде мемлекеттік орган құжатты әзірлеу мерзімін есепке алмайды және үш жыл бұрын қойылған тарифті өзгертпейді. Ал кәсіпкердің сол бағамен келіспеске амалы жоқ.
«Мұндай тапсырысты бірнеше рет орындадым. Техникалық ерекшелікті дайындау барысында мамандар нарық жағдайына сәйкес келмейтін тауар бағаларын көрсетеді. Ал қызметтер мен тауарлар туралы ақпарат сайттардан алынады, ондағы мәліметтер бірнеше жылдан бері жаңартылмаған», дейді «Galamat» жиһаз фабрикасының директоры Талас Меңсізбаев.
Қорыта айтқанда, әкімшілік кедергілерді шешу үшін «Атамекен» ҰКП мен жергілікті атқарушы органдарға ұсыныс-хат жіберілетін болды.
Нұрбол ӘЛДІБАЕВ,
«Егемен Қазақстан»
ТАЛДЫҚОРҒАН