Еліміздің әр түкпірінде өткізіліп отырған «Мейірімділік керуені» шарасы аясында Алматының кішкене тұрғындарына қала әкімдігі мен Қазақстан халқы Ассамблеясы үлкен сый жасады.
Дәстүрлі «Мектепке жол» акциясын қолдау мақсатында өткізілген шара барысында қалада тұратын көп балалы отбасылар мен жарымжан сәбилерді тәрбиелеп отырған шаңырақтарға, Жасөспірімдерді бейімдеу орталығының тәрбиеленушілеріне материалдық көмек ретінде оқушылардың мектеп жабдықтары сыйға беріліп, жеткіншектерге шағын мереке ұйымдастырылды.
Көп салалы «Заңғар» сауда орталығының «Lumiera» кинотеатрында мультфильм тамашалап, балмұздақ пен сусынға қарық болған жеткіншектердің қуанышында шек болмады. Оларға сыйлық жасап, мерекелік көңіл күй сыйлаған Қазақстан халқы Ассамблеясы хатшылығының, қала әкімдігі мен «Қоғамдық келісім» коммуналдық-мемлекеттік мекемесі, Ассамблея жанындағы Аналар кеңесі мен жеке кәсіпкерлік топтардың өкілдері келе жатқан жаңа оқу жылымен құттықтап, білім сапарында сәттілік тіледі.
Қанат ЕСКЕНДІР,
«Егемен Қазақстан»
АЛМАТЫ