Құрбан айт құтты болсын!

Аса қамқор, ерекше мейірімді Алланың атымен бастаймын! Құрметті бауырлар! Баршаңызды күллі мұсылман қауымы асыға күткен қасиетті, ұлық мереке – Құрбан айт мейрамы­мен құттықтаймын! Отба­сы­ларыңызға амандық, мықты ден­саулық, жұмыстарыңызға береке тілеймін. Бәрімізді айтқа аман-есен жеткізген Алла тағалаға сансыз шүкірлер мен мақтаулар болсын! Ислам діні сан ғасырдан бері еліміздің рухани тірегі болып келеді. Халқымыз асыл дініміздегі Жаратушы Ие­міз белгілеп берген екі мей­рамның ұлығы, айтулы мереке – Құрбан айтқа ай­рықша дайындалып, көп­шілікпен ерекше атап өтеді. Берекеге бастаған бұл мереке бірлік пен игілікке, мейірім мен кешірімге үндейді. Айт – ағайын арасын жа­қын­дас­тыра түсетін, адам­зат баласын иман­дылық­қа ұйытып, қанағат пен тәубеге шақыратын ұлық мейрам. Бұл күндері барша мұсылман құрбан шалумен ғана емес, Ұлы Аллаға ұнамды әрбір ізгі амалы арқылы Раббысының разы­лығына, рақымына жақындай түседі. Өйткені, араб тіліндегі «құрбан» сөзі «жақын болу», «жақындау» деген ұғымдарды білдіреді. Қасиетті Құранда: «Ұмытпаңдар, олардың еті де, қаны да ешқашан Аллаға жетпейді. Оған жететін нәрсе – жүректеріңізге ұялаған тақуалықтарың (шынайы ниеттерің)» («Хаж» сүресі, 37-аят), – деп баяндалған. Айт күндері қажылық парызын өтеп жатқан мұсыл­мандар да Жаратушыға жалбарына дұға жасап, құрбандық шалады. Қасиетті Мекке қаласында еліміздің амандығы, халқымыздың бірлігі мен берекесін тілеп жатқан отандастарымыздың да дұғасы, қажылығы қабыл болғай! Қаржылық мүмкіндігі жоқ адамға құрбан шалу – міндет емес. Құрбандық еті ағайын-туыс, көрші-қолаң, тұрмысы төмен отбасыларына, жетім мен жесірлерге, мүгедектер мен науқас жандарға таратылады. Құрбан айт күні ерте тұрып, ғұсыл құйынып, айт намазына қатысу – пай­ғам­барымыз Мұхаммедтің (Оған Алланың салауаты мен сәлемі болсын) сүннеті. Қадірлі ағайын! Барша жамағатты, еліміздің жанашыр азаматтарын мүбәрак мейрамның құрметі үшін мүгедектерге, жетімдер мен жесірлерге, қараусыз қалған қарттарға қайырымдылық жасауға шақырамын. Алла тағала дұға-тілек­теріміз бен сауапты істері­мізді және шалған құрбан­дық­­тарымызды қабыл еткей! Әмин! Ержан қажы МАЛҒАЖЫҰЛЫ, Қазақстан мұсылмандары діни басқармасының төрағасы, Бас мүфти Қымбатты отандастар! Осынау  барша мұсылмандар үшін қасиетті күні Қазақ­стан халқы Ассам­блеясы сіздерді Құрбан айт мерекесімен құттықтайды! Құрбан айт – бұл келісім мен татулық, жасампаздық пен үйлесім. Біздің еліміз­де бұл мейрам мұсылмандарды ғана емес, Қазақстанның барша халқын бірік­тіреді. Тәуелсіздіктің 25 жылы ішінде Құр­бан айт мәдени және рухани құн­ды­лық­тарымызды дамытуда, қоғамдағы бірлікті нығайтуда маңызды орынға ие болды. Мемлекет басшысының бейбітсүйгіш саясатының арқасында Қазақстандағы түрлі конфессиялардың достығы мен өзара түсіністігі бүкіл әлем үшін эталонға айналды.  Әлемдік және дәстүрлі діндердің  лидерлері жалпы адамгершілік бағыттарын  іздеп, диалог орнату және келісілген шешімдер қабылдау үшін біздің елге келеді. Құрметті отандастар! Құрбан айт адамдардың мұқтаж жандарға нақты көмек көрсетуге, құрбандық жасауға дайын екендігін білдіреді және басқа жандарға мейірімділік танытып, ынтымақтастық жасаудың көрнекі мүмкіндігі болып табылады. Сондықтан да Құрбан айт мейрамының қарсаңында Қазақстан халқы Ассамблеясы бүкіл елде қайырымдылық айлығын өткізу туралы жария етіп, Қазақстан халқын жақын адамдарына көмектесуге шақырды. Құрметті жерлестер! Қасиетті Құрбан айт мейрамы бізге игілік-берекесімен келсін! Елімізде әрдайым бейбітшілік, бірлік пен келісім салтанат құрсын! Мейрам сіздердің отбасыларыңызға өз шуағын төгіп, қуаныш пен береке-бірлігін әкелсін! Қазақстан халқы Ассамблеясының Кеңесі