Абайдың «Жидебай-Бөрілі» мемлекеттік қорық-музейінде «Шыңғыстау» сурет галереясы ашылды. Галерея осы зерде ордасында жинақталған туындылар негізінде жұртшылық назарына ұсынылып отыр. Шыңғыстау – қазақ халқының ұлы перзенттері Абай Құнанбайұлының, Шәкәрім Құдайбердіұлының, Мұхтар Әуезовтің туған жері. Еуразия құрлығының кіндік тұсы саналатын Шыңғыстау өлкесінде үш алыптың дүниеге келіп, сөз өнерін әсемдік биігіне көтеруі – адамзат тарихында сирек кездесетін құбылыс. Міне, галереяда осынау қасиетті Шыңғыстау өңірінің табиғаты мен тарихи жерлері Абай қорық-мұражайы қорында жинақталған жергілікті қылқалам шеберлерінің туындылары арқылы көрсетіледі. Сурет көрмесінде белгілі өнер иелері М.Әлиакпаров, М.Беляев, Ғ.Макаров, Н.Өтепбаев Т.Байғалиев, Т.Татиев және тағы басқа суретшілердің 100-ден астам туындылары қойылған.
– Әсіресе, халқымыздың сурет өнеріндегі мақтанышы Әбілхан Қастеевтің жауһар туындылары Абай музейіне келушілердің ерекше қызушылығын тудырады деп сенеміз. Әйгілі қылқалам шеберінің музей қорында 12 туындысы сақталған болса, соның бірі – «Жас Абай» суреті де келушілердің көзайымына айналды, – дейді музей әкімшілігі.
Сурет галереясының бір ерекшелігі – қылқалам шеберлерінің туындылары музейдегі Абай өмірі мен шығармашылығын паш ететін бөлімдердің мазмұнын тереңірек аша түсуге көмектеседі. Мәселен, «Жаз» залының маңдай алдындағы қылқалам шеберлерінің туындылары Шыңғыстау өңірінің табиғатын алдыңызға жайып салса, «Үш қайнар бұлақ» экспозициясындағы суреттер ұлы ақын шығармаларының терең тамырларымен үндеседі.
Думан АНАШ,
«Егемен Қазақстан»
СЕМЕЙ