«Астана ЭКСПО-2017» Халықаралық мамандандырылған көрмесінің комиссары Рәпіл Жошыбаев Бразилияның Парана штатындағы Фос-ду-Игуасул қаласында Бразилия секциясының комиссары Золчир Чиапечимен кездесіп, бұл мемлекеттің ЭКСПО-2017 көрмесіне қатысатындығы туралы шартқа қол қойды.
Бразилияның энергетика және тау-кен өнеркәсібі министрлігінің ұсынысымен ЭКСПО-2017 Халықаралық мамандандырылған көрмесіне таза және жаңғырмалы энергия өндіруде әлемдегі көшбасшылардың бірі «Итайпу бинасионал» компаниясы қатысатын болды. 1973 жылы құрылған бұл компанияны Бразилия және Парагвай мемлекеттері бірлесіп басқарады. Аталмыш компания екі мемлекеттің шекарасымен өтетін Парана өзенінде салынған дүние жүзіндегі ең ірі «Итайпу» гидроэлектрстансасының жұмысын жүргізеді. «Итайпу» ГЭС-і екі елдің экономикасы мен энергетикасында орасан зор рөл атқарады.
Бразилия мемлекеті электр энергиясына деген сұранысының 20 пайызын осы су электр стансасы өндіретін қуаттан алатын болса, Парагвай мемлекетінің электр қуатына деген сұранысының 80 пайызын «Итайпу» ГЭС-і жауып отыр. Мамандардың зерттеуі бойынша, бұл әлемдегі таза электр қуатын өндіретін ең ірі станса болып табылады. Жұмыс істей бастағаннан бергі мерзімде аталмыш компания 2,3 миллиард мегаватт электр энергиясын өндірген. Бұл электр стансасының тағы бір ерекшелігі, екі мемлекеттің ортақ су көзін басқарудағы тамаша тәжірибесін көрсетеді. Шекаралық өзенде орасан зор электр қуатын өндіре отырып, екі мемлекет жаңғырмалы энергиялық қуат көздерін кеңейту мақсатында тиімді бағдарламаны жүзеге асырып келеді.
«Астана ЭКСПО-2017» көрмесінің аясында «Итайпу бинасионал» компаниясы биогаз, биоэтанол өндіру жөніндегі инновациялық жобаларын көрсете отырып, күн энергиясын пайдаланудағы озық технологияларын жария етпек. Көрмеге қатысу туралы шартқа қол қоюмен бірге, Бразилия мемлекеті елордадағы ЭКСПО қалашығындағы ең ірі павильондардың бірін иеленбек.
Жылқыбай ЖАҒЫПАРҰЛЫ,
«Егемен Қазақстан»