Жеңіл атлетиканың жампозы

Әмин Тұяқовтың ізбасарлары жарыс жолына шықты Спорт саласында қазақ­тың атағын аспандатып, мерейін тасытқан ұлдардың бірі – Әмин Тұяқов. Жеңіл атлетикада халқымыздың туын желбіреткен желаяқ спорт алаңында жүрген кезінде тек қазақтың, Қазақстанның емес, бүкіл Кеңес Одағының мақ­танышына айналған еді. Ал маңғыстаулықтар мұнайлы түбектегі Шайыр ауылында 1937 жылы дүниеге келген Әмин ағаны айрықша құрметтейді. Соның бір айғағы – көзі тірі саңлақты ардақтау мақсатында Жаңаөзен қаласында Әмин Тұяқов атындағы спорт сарайы ашылса, оқушылар арасында дәстүрлі Әминиада ойындары өтіп тұрады. Биыл 8-ші рет жалауын көтерген бұл спорт сайысы Қарақия ауданының Құрық ауылында 2001-2002 және 2003-2004 жылдары туылған жасөспірімдер арасында ұйымдастырылды. Ауыл спортын көтеру, ауылдағы жастар арасынан жеңіл атлетикада мықтыларды анықтап, республикалық жа­рыстарға баруына жол ашу, елі­міздің абыройын асырар чемпиондарды дайындауды мақсат еткен сайысқа 7 команда қатысып, 30-дан астам желаяқ өзара сынға түсті. Жеңіл атлетиканың 3 түрі бойынша өткізілген Әминиадада балалар 100 м, 200 м, 400 м, 800 м, 1500 м жүгіруден және 4х100м. эста­феталық жүгіруден жарысты. Қарақия ауданының әкімі Ә.Дауылбаев және даңқты жел­аяқ Ә.Тұяқовтың өзі жарыс қоры­тындысында жеңімпаздарды ар­найы сыйлықтармен және төсбел­гілермен марапатталады. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы