Азамат асуы

Алдыңа үлкен мақсаттар қоя білу бар да, оны аяғына жеткізіп іске асыра білу бар. Тынымсыз еңбек, ізденіс қана алға қойылған мақсатқа жетуге негіз бола алады. Осындай мақсатшыл азаматтардың бірі, еліміздің дамуына үлесін қосып, мемлекеттік маңызы бар жобалардың іске асуына ат салысқан қайраткер, үл­кенге құрмет, кішіге үлгі көрсете біле­тін ардақты азамат Орынбай Рах­ман­­берді­ұлы туралы сөз қозғауды жөн көр­­дім. Еңбек жолында талай күрделі кезең­­дерді бойынан өткерген, мол тәжі­рибе мен парасат иесі жайында пікір біл­діру оңай болмағанымен, Сенат депу­та­ты болған кезінде көмекшісі қыз­метін атқарғандықтан, қызмет бары­сын­дағы іскерлік әрі азаматтық бол­мысы­на куә болдым. Бойындағы кішіге де, үл­кенге де құрмет көрсете біле­тін қасиеті, еңбекқорлығы мен елге деген шынайы жанашырлығы Орынбай Рахман­бердіұлы туралы сөз қозғауыма түрткі болды. Тәуелсіз Қазақстанның алғашқы онжыл­дығындағы елдегі күрделі әлеу­мет­тік-экономикалық жағдай есімізде. Мемлекеттегі жұмыссыздық, елдің тұрмыс-тіршілігі мен ахуалының күрт төмендеуі қоғамда түрлі әлеуметтік қай­шы­лықтардың үдей түсуіне әкеліп соқ­қаны белгілі. Осындай күрделі кезеңде Тәуелсіздігіне енді ғана қолы жетіп, дамудың жаңа жолына түскен Қазақстан Үкіметінің алдында үлкен мақсаттар тұрды. Ол мақсат – дамыған, әлем мо­йын­даған, халқының әлеуеті артқан, эконо­микасы қуатты, Тәуелсіздігі баян­ды мемлекетті құру болатын. Сын-қатерлерге толы сол шақта Елбасы Нұрсұлтан Әбішұлы Назарбаев ел болып, етек-жеңін енді жинай бас­та­ған мемлекеттің дамуына бағдар бола­тын жаңа экономикалық саясатты ұсынды. Жергілікті басқару органдарындағы, бизнес саласындағы іскер азаматтардың жаңа толқыны мемлекет экономикасын алға қарай ілгерілетуге ат салысып, ел өміріне етене араласу мүмкіндігіне ие болды. 1990 жылдары нарықтық эко­­но­мика­ның заңдылығы орнай баста­ған кезең­де еліміздің әр аймағынан мем­ле­­кеттік ор­гандарда, бизнесте жемісті еңбек ет­кен мықты менеджерлер шыға бастады. Солардың қатарында Оңтүстік өңірі­нің ауылдық аймақтарында еңбек жолын бастап, Тәуелсіздіктің алғашқы жылдары өндіріс орындарында қызмет еткен Орынбай Рахманбердіұлын замандастары мен қалың жұртшылық жақсы біледі. Себебі, Орынбай Рахман­бер­діұлы – өмір жолында жинаған тәжі­ри­бесін ел игілігіне жұмсай білген адам. Дегенмен, өз басым Орынбай Рах­ман­­­бердіұлының өмірбаянын сырттай білгеніммен, жақын танысып, жұмыс жасаймын деп ойламағаным рас. Университетті аяқтап, жастардың арманына айналған Астанаға аяқ басқан кезім. Арман қуып, елордаға келген көп жастардың бірі ретінде жұмысқа ор­на­ласып, 2003 жылдары еңбек жолымды бастадым. Қызмет барысында Орынбай Рах­манбердіұлы туралы естіп, біліп, бұ­қаралық ақпарат құралдары арқылы қызметі жайында хабардар болып тұратынбыз. Сәті түсіп, 2007 жылдан бастап көмекші ретінде бірге 7 жылға жуық жұмыс жасау мүмкіндігі туды. Сол кезең бүгінде мен үшін үлкен еңбек мектебіне айналды. Алғаш жұмысқа кіріскен күннен бастап депутаттың іскер­лігі мен жағдайды бағамдай біле­тіні, қоғамдық мәселелерді терең түсіне­тіні мені таңдандырған. Орынбай Рахманбердіұлы Оңтүстік өңірінен сайланған депутат ретінде өңірдің әлеуметтік-экономикалық дамуы­на мүмкіндік туғызатын жоба­лар­­дың жүзеге асуына көп көңіл бөлді. Ай­мақтың тұрмыс-тіршілі­гін, гео­графиялық ерекшелігін жақсы бі­летін депутат туындаған әр мәселенің маз­мұнын бірден түсіне қоятын. Азамат­тар­дан келіп түскен арыз хаттар, өтініштер болсын, мұқият қарап, зерделейтін. Атап айтқанда, Орынбай Рахман­бердіұлы Оңтүстік өңірі үшін ғана емес, жалпы Қазақстан үшін маңызды жоба – өткен ғасырдың 80-жылдары жоспарланып, шешімі табылмаған Қасқасу жобасын дамыту туралы Үкі­мет басшысына депутаттық сауал жол­­­дап, курорттық аймақтың әлеу­мет­­­тік маңызына айрықша назар ауда­руды ұсынды. Нәтижесінде, аймақ­тың инфра­құрылымын дамытуға рес­пуб­лика­лық бюджеттен қаражат бөлінді. Ендігі кезекте, жергілікті атқарушы ор­ган­дар осындай маңызды жобаны әрі қарай жалғастырып, ойдағыдай аяқтайды деген сенімдеміз. Себебі, туризм саласын дамыту – бүгінгі таңда маңызды мәселе. Оңтүстік аймақтың ауа райының қолайлы жағдайы туризмге сұранып тұрғаны айқын. Кәсіби тәжірибесі мол білікті маман ретінде Орынбай Рахманбердіұлы оңтүстік өңірі халқының демографиялық өсімге бейімділігін ескере отырып, осындай жобаларды ілгерілету халықты жұмыспен қамту мәселесіне де оң сер­пін тигізетінін анық түсініп, болжай білген. Шындығында, бүгінгі күні Оң­түс­тік Қазақстан облысында 2,8 мил­лион­нан аса адам тұрады. Бұл көр­сет­кіштің алдағы 20-30 жылда есе­леніп өсетіні анық. Демек, туризмнің қосы­мша жұмыс күші, шағын және орта бизнесті өрістетін фактор екеніне назар аударып, әлеуметтік мәселелердің шешімін табуды көздеген Орынбай Рахманбердіұлының көтерген мәселесі – елдің мәселесі. Бұл орайда, депутат қызметінде Оңтүстік Қазақстан облысы «Көксарай» су қоймасының салынуына үлкен үлесін қосқаны да есімде. Жыл сайынғы су басу қаупін түпкілікті шешу мақсатында «Көксарай» су қоймасы құрылысының әлеуметтік маңыздылығы ескеріліп, аталған мәселе Елбасы тарапынан қол­дау тауып, одан кейін Үкімет отыры­сында оң шешім шығарылып, су қой­ма­сын салуға қаражат бөлінген болатын. Орынбай Рахманбердіұлының депу­таттық лауазымда жүзеге асырған игі істері – егемен еліміздің отансүйгіш аза­маттары үшін үлгі. Еңбегі өміріне айнал­ған тұлғаның жетекшілігімен жұмыс іс­теу – мен үшін де үлкен тәжі­рибе бол­ғаны рас. Мемлекеттік, қоғамдық және саяси-әлеуметтік салаларда жұмыс істеген Орынбай Рахманбердіұлы бүгінде Оңтүстік Қазақстан облысы Қоғамдық келісім кеңесінің төрағасы ретінде еліміздегі тұрақтылық пен келісімді, ұлттардың достығы мен татулығын сақтауға ат салысып келеді. «Жақсының жақсылығын айт, нұры тасысын» деген сөз бар халқымызда, сондықтан өз көзіммен көрген игі істер жөнінде айтуды жөн деп санадым. Еңбегі халыққа белгілі елдің аза­матына алғыс шексіз.  Руслан ДҮЙСЕНОВ  АСТАНА