Мектеп киім үлгісінің бірыңғай ережеге сәйкестігі туралы мәселе Астанадағы Орталық коммуникациялар қызметінде өткен баспасөз мәслихатында талқыланды. Бұл шараға Білім және ғылым вице-министрі Эльмира Суханбердиева, Әділет вице-министрі Зәуреш Баймолдина, Дін істері және азаматтық қоғам министрлігінің дін істері комитетінің төрағасы Ғалым Шойкин қатысты.
Алғашқы сөзді Э.Суханбердиева алып, елімізде міндетті мектеп формасы 2016 жылдан енгізілгенін атап, қазір еліміздегі оқушылардың 76 пайызы (2 млн-нан астам) мектептерде белгіленген үлгіні киіп жүргенін жеткізді. Ал республикамыздағы бастауыш сыныптардың оқушылары 100 пайыз жаңа үлгіде мектеп формасын киеді екен.
Алайда, соңғы жылдары білім беру ұйымдары оқушылардың діни үлгіде киіну мәселесіне тап болып отырғанын айтты. Бірақ ел заңдарында бұған қатысты нақты баптар барын еске салып, оған «Білім туралы» Заңның 3-бабын атады. Сол секілді білім беру мен тәрбиелеу жүйесі дін мен діни бірлестіктерден бөлінгенін және зайырлы сипатта екенін еске салып, ол «Діни қызмет және діни бірлестіктер туралы» Заңда бекітілгенін де атап көрсетті.
«Бұл – зайырлы сипаттағы мектептерде әлдебір дінді тікелей немесе жанама насихаттауға жол берілмейді деген сөз. Осыған байланысты 2016 жылдың 14 қаңтарында Білім және ғылым министрлігінің №26 бұйрығымен міндетті мектеп үлгісі үшін бірыңғай талап қоятын ереже енгізіле бастады. Онда «Мемлекеттік білім беру ұйымдарында қолданыстағы заңнамаға сәйкес белгіленген ережелерді ұстану қажеттігі айтылған», деген Білім және ғылым вице-министрі қыздар мен ұлдарға арналған киім үлгісін талдап беріп, діни атрибуттарды, киім және баскиім үлгілерін киюге жол берілмейтінін, бұған дейін де осы қағида болғанын қадап айтты.
Әділет вице-министрі З.Баймолдина Білім және ғылым министрлігінің бұйрығы заңға сай, мұнда ешқандай құқық бұзушылық жоқ екенін атады. Әр азамат заң талабын бұлжытпай орындауы керектігін де тілге тиек етті. Жалпы, Ата Заңымыздан бастап барлық құжаттарда азаматтардың құқығы қорғалатыны тайға таңба басқандай жазылғанына нақты дәлел-дәйектер келтірді.
Дін істері комитетінің төрағасы Ғ.Шойкин бүгінгі бала, яғни оқушы еліміздің ертеңі екенін, сондықтан оларға тәлім-тәрбиені білім ұясында терең беріп, заң талаптарын үйретіп отыру тура жолдан тайғызбайтынын атады.
Шынында, «Жігіттер, күн болды ойланарлық... Асыл сол – ақыл, білім бойда барлық», деп Шәкәрім айтпақшы, барлығын ақылға жеңдіріп заң аясында шешу қажеттігі қай-қайсымызды да ойландыруы тиіс. Әсіресе, ұл-қызының ертеңінен үміт артқан ата-аналар түрлі киім үлгісіне емес, ұрпағының білім-білігін ойласа ұтылмас еді.
Киім үлгісінің заңға сай болуының тек мектепте ғана емес, жоғары оқу орындарына да қатысы бар көрінеді. Бұрын білім ұяларында 5-6 оқушы діни үлгімен киінетін болса, соңғы кездері бұл 300-ден астам ұл-қыздың «еншісіне» тиіпті. Бұл – алаңдатарлық мәселе. Етек жая берсе, білімге құштар ұрпақ сол білімнен қол үзіп қалуы да ғажап емес.
Ендеше, білім беру, дін саласындағы азаматтар, ата-аналар мен ұстаздар жұмылып ой-санасы әлі орныға қоймаған ұрпақты жолдан тайдырып алмауға күш салып түсіндіру жұмыстарын жүргізулері тиіс.
Сүлеймен МӘМЕТ,
«Егемен Қазақстан»