Қазақстан Республикасының Мемлекеттік хатшысы Гүлшара Әбдіқалықова «Н.Назарбаевтың үлгісі: бейбітшілік пен келісімнің 25 жылы» атты халықаралық ғалымдар мен сарапшылар форумына қатысты, деп хабарлайды egemen.kz akorda.kz сайтына сілтеме жасап.
Ел тәуелсіздігінің 25 жылдығына арналған форумға Қазақстан халқы Ассамблеясы төрағасының орынбасары Е.Тоғжанов, Парламент Мәжілісінің депутаттары, мемлекеттік органдардың, ғылыми және шығармашыл зиялы қауымның, этномәдени бірлестіктердің өкілдері, қоғам қайраткерлері, Қазақстан халқы Ассамблеясы ғылыми-сараптамалық кеңесінің мүшелері, Ресей, Еуропалық Одақ, Латын Америкасы, Үндістан, Қытай, Пәкістан, Оңтүстік Корея, Жапония елдерінің ғалымдары мен сарапшылары қатысты.
Форумға қатысушыларға арнаған сөзінде Г.Әбдіқалықова қоғамдық келісім мен жалпыұлттық бірліктің қазақстандық үлгісін қалыптастырған Нұрсұлтан Назарбаевтың ауқымды тұлғалық ерекшелігіне тоқталып өтті. Мемлекеттік хатшы Қазақстан этносаралық келісім мен халық бірлігі саласында жаһандық көшбасшылардың біріне айналғанын айтты.
Форумға қатысушылар көпұлттылық жағдайындағы этносаралық диалог моделінің отандық және әлемдік тәжірибесін, полиэтникалық қоғамдағы интеграциялық үдерістерді, сондай-ақ тіл саясатының біріктіруші рөлін талқылады.
Форум қорытындысы бойынша Қазақстан Президентіне жолданатын оның бейбітшілік пен келісім саясатын, сондай-ақ әлемдік қауіпсіздік пен тұрақтылықты қамтамасыз ету жөніндегі жаһандық бастамаларын қолдау туралы үндеу мәтіні бекітілді.