Президенттің көмекшісі – Қауіпсіздік Кеңесінің хатшысы Владимир Жұмақанов 16-17 қараша күндері Мәскеуде өткен ТМД-ға мүше елдер Қауіпсіздік кеңестері хатшыларының IV кездесуіне қатысты.
Шара барысында делегация басшылары ТМД кеңістігіндегі тұрақтылық пен қауіпсіздікке төнуі ықтимал сын-қатерлер аясындағы өңірлік өзара іс-қимылдың көкейкесті мәселелерін талқылады. Атап айтқанда, діни экстремизмге бірлесіп қарсы тұру, заңсыз миграциямен күрес және ақпараттық қауіпсіздікті қамтамасыз ету мәселелері қарастырылды.
Қазақстан мен Ресей қауіпсіздік кеңестерінің аппараттары деңгейінде дәстүрге айналған екіжақты консультациялар шеңберінде В.Жұмақанов өзінің ресейлік әріптесі Н.Патрушевпен келіссөз жүргізді.
Әскери-техникалық саланы қоса алғанда, екіжақты қарым-қатынастың кең көлемі бойынша пікір алмасылды. Қазақстан мен Ресейдің Каспий өңіріндегі өзара іс-қимылдары мәселелері қарастырылды. Сондай-ақ, екі мемлекет қауіпсіздік кеңестері аппараттарының арасында 2017-2018 жылдарға арналған Ынтымақтастық жоспарына қол қойылды.
«Егемен-ақпарат»