Еуразиялық Топ (ERG) құрамындағы «Қазақстан алюминийі» АҚ-қа қарасты №1 жылу электр орталығы кәсіпорнында 2009 жылдан осы күнге дейін жүргізілген инвестициялық бағдарламалар аясында қолданыстағы ескі құрылғылар, құрал-жабдықтарын жаңартып келеді.
Қазір еліміздегі әрбір кәсіпорын заман талабына сай жаңа технологиялар үрдісімен жұмыс жасауға көшті. Бұл жаңашылдықты баспасөз турына қатысқан тілшілер де көрді.
Келген жеріміз «Қазақстан алюминийі» АҚ алып кәсіпорны. Биік мұржаларымен қоюлана шыққан түтін көк әлемді тұншықтыра жоғары көтеріліп барады. Зауыттағы қауіпсіздік шараларын ескеріп тілшілерге де арнайы каска, жеңсіз жамылғы кигізіп, цехтарға алып жүрді. Бір-екі сағатқа тілшілер де зауыт жұмысшыларына айналып шыға келдік. Гүрілдеген цех ішінен құлақ тұнады. Өндірістің нағыз қайнаған қазаны осы жерде. Біздің келуіміз де бірінші рет емес, әр сапарда алып зауыттың жеткен жетістіктерін, елімізде қабылданған инновациялық-индустриялық бағдарламаларға сай атқарып жатқан жұмыстарын көріп жарыса жазып жатамыз. Бүгінгі келген мақсатымыз кәсіпорынның инвестициялық жобаларды іске асырып жатқандығы жайлы өз көзімізбен көріп, танысу болды.
Зауыт бәрімізге белгілі, 50 жылдан астам уақыт алюминий өндіруде. Баспасөз туры кезінде ескі құрылғының жаңа қондырғымен ауыстырылып, жұмыс істеп тұрғанын көрдік. Ал №1 жылу орталығы алюминий зауытын бумен, электр қуатымен, облыс орталығын ыстық сумен, жылумен қамтамасыз етіп отыр. Жылу орталығының бас инженері орынбасарының міндетін атқарушы Александр Люфттың айтуынша, орнатылған бұл жаңа агрегат турбиналы генераторды суытып тұруға арналған. Бұрынғы құрылғылар болса әбден тозды. Енді энергия үнемдеуге де мүмкіндік бар. Тағы бір жаңалық – жаңа қондырғы жанынан «Вибробит-300» нысаны да іске қосылды. Құны – 34 миллион теңге. Бұл компьютерлік кешен стансадағы тербеліс мөлшерін өлшеп, апатты жағдайлардан соң аз уақытта қайта қалыпқа келуге көмегін тигізеді. Яғни, тозығы жеткен механикалық тетіктің орнын автоматика басты деген сөз.
Түтін демекші, «Қазақстан Алюминийі» АҚ қоршаған орта, табиғат қорғау шараларына да көңіл бөлуде. Инвестициялық бағдарламаларды жүзеге асыру барысында биік мұржаларға «СГК»506 атты газдан тазалайтын қондырғы-анализаторлар орнатылыпты. Құны 145 миллион теңге тұратын тазартқыш заманауи бұл кешендер қазандықтардан шығатын түтін мен газдың сапасын, мөлшерін онлайн-режімде бақылауға мүмкіндік береді.
– Жаңа қондырғылар, жаңғырту бағдарламалары кәсіпорынның еңбек өнімділігіне, техникалық-экономикалық көрсеткіштерін арттыруға да мол мүмкіндік, – дейді А.Люфт.
Мысалы, электр қуатын өндірудің жылдық мөлшері 2,3 млрд кВт/сағаттан 2,5 млрд кВт/сағатқа дейін артыпты. Айтса айтқандай, қазір өңірде жылыту маусымы басталды. Бұл зауыттың №1 жылу орталығы үшін аса маңызды кезең. Сондықтан, 2016-2017 жылғы жылыту маусымына дайындық жыл сайын ерте күзден басталады. Стансаның бекітілген электр қуаты-350 мың МВт, жылу қуатты 1182 Гкал. Биыл №1, №7 қазандықтың ағымдық, ал, №3, №5 қазандықтарға күрделі жөндеу жұмыстары желтоқсан айының 15-не дейін аяқталмақшы. Орталықта қызу жұмыс. Қазір стансада 80 877 тонна көмір, 1207 тонна мазут қоры бар. Станса қысқа дайын.
Кәсіпорында инвестициялық міндеттемелердің орындалуы басты назарда. Жалпы, 2015-2016 жылдары кәсіпорынды жаңғырту жұмыстарына 5 млрд теңгеге жуық қаржы бағытталыпты. Келесі кезекте жаңғырту бағдарламасы бойынша №4 қазандықтың іші-сыртын ауыстыру жобасы күтіп тұр.
Фарида БЫҚАЙ,
«Егемен Қазақстан»
Павлодар облысы
Суретті түсірген
Антон КОЗЛОВ