Көктемгі егіске дайындық қазіргі кезде Шығыс Қазақстан облысындағы Үржар ауданында барынша қызу қарқынмен жүріп жатыр. Аудандағы 5 мыңға жуық шаруа қожалықтары қолдарындағы бар техникасын ретке келтіріп, тұқымдарын сұрыптап, жанар-жағармайларын дайындап, аталған науқанға дайын отыр десе де болады.
Биылғы жылы ауданда 138 мың 329 гектар алқапқа егін егілмек. Оның 2295 гектарын көкөніс пен жеміс-жидек, 925 гектарын бақша дақылдары, 869 гектарын көпжылдық шөп егістігі құрамақ.
Көктемгі дала жұмыстарына 5452 тонна дәнді-дақыл тұқымдары әзірленген. Оның 4654 тоннасы немесе 85 пайызы наурыз айының бірінші онкүндігінде зертханалық тексеруден өткізілді.
Тракторлардың 70 пайызы, тіркемелердің 80 пайызы әзірлік сапына қойылды.
Аудандағы шаруашылықтардың бірқатары лизинг арқылы жаңа техникаларға ие болды. Мәселен, «Бірлік» шаруа қожалығы құны 16,8 миллион теңге тұратын «Есіл» комбайнын, әрқайсысы 5,6 миллион тұратын 2 МТЗ-82 тракторын сатып алса, «Бибі» шаруа қожалығы осындай екі трактор мен 700 мың теңгелік 1 КДП мәшинесін меншіктеп үлгерді. Ал «Қайрат» шаруа қожалығы бағасы 11,5 миллион теңгеге «Енисей» комбайнын сатып алды. Жалпы, мұндай мысалдарды көптеп келтіре беруге болады.
Аудан аумағына былтырғы жылы қар тым қалың түскен еді. Оған қарағанда биылғы қар жұқалау болып отыр. Сондықтан егістіктің ылғалдылығын арттыру мақсатында көптеген шаруашылықтар қар тоқтату жұмысымен шұғылданды.
Сөйтіп, аудан диқандары алдымыздағы көктемгі егіске үлкен әзірлікпен келіп отыр. Ал жақсы әзірлік – мол өнім кепілі. Іске сәт дейміз, ендеше!
Бисенғазы ҰЛЫҚБЕК, журналист.
Шығыс Қазақстан облысы,
Үржар ауданы.