Ақмола облысының ауылдарындағы білім беру мекемелері еліміздің жоғары және арнайы орта оқу орындарын бітірген жас мамандармен толығуда. Оның қатарына Целиноград ауданының Приречное ауылындағы №22 мектеп те енді. Өйткені өткен күзде осы мектептегі ұстаздар ұжымына 6 жас маман келіп қосылды.
Бұлардың ішінде Мақпал Мұқанова сияқты жас мұғалім де бар. Ол 2010 жылы Еуразия гуманитарлық институтын бітірген соң «Дипломмен – ауылға!» ұранымен Приречное ауылына келді. Жас маман өзіне тиесілі ынталандыру қаржысына қоса несие алып, үй сатып алыпты. «Менің жұмыс атқаруыма жақсы жағдай жасалған. Мектепте ондаған жыл жұмыс істеген ардагер ұстаздар келген жас мамандарға білгенін үйретіп, қамқорлық көрсетуде. Әсіресе, ұстаздық тәжірибесі 37 жыл, ал мектеп директоры қызметінде 26 жыл істеп келе жатқан Зәуре Дүйсенбаеваны атап көрсетпеу мүмкін емес», – дейді ол.
–––––––––––––
Суреттерде: ардагер-ұстаз З.Дүйсенбаева жас мамандар ортасында; тарих пәнінің оқытушысы М.Мұқанова.
Суреттерді түсірген В.БАХМУТСКИЙ.