Басты міндеттердің бірі – қала тұрғындарының өмір сүру жағдайын жақсарту. Елордада жайлы демалыс орындарын арттыру үшін 50 қоғамдық орын жасалады, соның ішінде 14 гүл бағы, саябақ пен жағалау, веложолдар мен қоғамдық орындар абаттандырылады. Бұл туралы Астана әкімдігінің баспасөз қызметі хабарлады.
Аталған нысандар ескі үйлерді бұзудың нәтижесінде пайда болған аумақта орналасады. Алға қойылған мақсаттарға қол жеткізу үшін «Астана бас жоспары» ҒЗИ жанынан Урбанистика орталығы өз қызметін бастады. Жаңа құрылымның негізгі мақсаты – қалалық ортаны жақсарту, зерттеулер жүргізу, тұрғындармен жұмыс істеу, әлеуметтік капиталды арттыру.
Орталық азаматтық қоғам мен қалалық әкімшіліктің арасындағы өзара тиімді іс-әрекетті орнатады, сондай-ақ, қала мен оның тұрғындарының ішкі ресурстарын жұмылдыруға ықпал етеді. Сонымен қатар, орталықтың қызметі шағын және орта бизнесті дамытуға жаңа серпін береді.
Қала көшелерін, саябақтар мен гүл бақтарын жақсарту бойынша ұсыныстарды жинау, демалуға арналған жаңа кеңістіктерді жасау, сондай-ақ, коммуникация каналдары арқылы қоғамдық пікір мониторингі мен зерттеулер жүргізу арқылы мамандар қоғамдық кеңістіктерді абаттандыру бойынша жобаларды іске асырады.