Кеше Астанада Қазақстан Республикасының Мемлекеттік хатшысы – Сыртқы істер министрі Қанат Саудабаев ТМД Атқарушы комитетінің төрағасы – Атқарушы хатшысы, ТМД-ға мүше мемлекеттер тарапынан байқаушы миссиясының жетекшісі Сергей Лебедевті қабылдады.
Кездесу барысында Қанат Саудабаев әңгімелесуші тарапты алдағы уақытта өтетін сайлауға дайындық барысымен таныстыра отырып, Қазақстан халықаралық стандарттарға сай ашық әрі әділ сайлау өткізуге дайын екендігін айта келе, «Біз елімізде халықаралық байқаушылардың белсенді әрі жемісті жұмыс жасауына мүдделіміз және оған барлық жағдай жасалып отыр, – деді өз сөзінде. – Еліміздегі маңызды саяси науқанның қарсаңында, оның ашық атмосфералық ауанда өтуіне мүдделіміз». Бұдан кейін ол ТМД-дан келген байқаушылар миссиясы тарапынан Қазақстандағы электоралдық науқан жұмысына шынайы түрде баға беріледі деген сенімін жеткізді.
«Шынайылық – ТМД кеңістігіндегі байқаушылар миссиясы өкілдері жұмысының басты ұстанымы. Біз өз қызметіміз барысында сайлау үдерісі өтіп жатқан елдің заңнамаларын басшылыққа аламыз», – деді бұл орайда сөз алған ТМД Атқарушы хатшысы Сергей Лебедев. Ол, сонымен қатар, Достастық елдерінің байқаушыларына сайлау учаскелерінде жұмыс істеуіне еркін қолжетімділік қалыптасқанын, ал барлық мемлекеттік құрылымдар миссия өкілдерінің сауалдарына жауап беріп жатқанын атап өтті. Кездесуде сайлауалды науқаны басталғаннан бергі мерзім ішінде байқаушылар миссиясының еліміздің Орталық сайлау комиссиясында, облыстық сайлау комиссияларында және сайлау учаскелерінде бірнеше кездесулер өткізгені де тілге тиек етілді.
Сондай-ақ, ТМД бірлестігі ықпалдастығының шеңберіндегі өзекті ынтымақтастық мәселелері әңгіме өзегіне айналған басқосу барысында еліміздің сыртқы саяси ведомствосының басшысы Достастық кеңістігіндегі интеграциялық үдерістерді одан әрі дамытуға және жандандыруға деген сенімді ұстанымның нығаятынына сендірді. Атап айтқанда, Достастықтың 20 жылдығын атап өтуге ортақ жоспарлар құру, алдағы уақытта Киевте өтетін Сыртқы істер министрлерінің кездесуіне дайындық барысы мен жай-күйі талқыланды.
Осы орайда, Мемлекеттік хатшы – Сыртқы істер министрі ТМД қызметінің «Бір жыл – бір тақырып» атты формуласының тиімділігін атап өтті. Бұл формулаға сәйкес, белгілі бір барлығына ортақ негізгі мәселені қарастырып, сол бойынша нақты жетістіктерге қол жеткізуге болады. Осыған байланысты біздің еліміздің бастамасымен «2011 жыл – азық-түлік қауіпсіздігін күшейту жылы» деп жарияланған.
Ләйла ЕДІЛҚЫЗЫ.