«Астана» клубының жаттықтырушысы Станимир Стойлов жартылай қорғаушы Рохер Каньястың кипрлік АПОЭЛ командасына ауысуы жайлы өз пікірін білдірді. Бұл туралы fca.kz хабарлады.
«Бірінші кезекте Каньястың командаға сіңірген еңбегін атап өткен жөн. Ол біз үшін өте маңызды ойыншылардың бірі болатын. Өздеріңіз білетіндей, Иван Милевскиймен келісімшартқа отырдық. Бапкерлер алқасының шешімімен маусымның алғашқы бөлігінде командаға тез бейімделуі үшін осы ойыншыға басымдық беруді ұйғардық. Ал кипрліктер Рохерге көптен бері көз тігіп жүргендіктен және команда Европа Лигасындағы жолын жалғастырып, өз біріншіліктерінде чемпиондық аттаққа таласып жатқандықтан, бұл шешім клуб үшін де, ойыншы үшін де пайдалы болады деп шештік. Рохер жазда клубымызға келеді», – дейді Стойлов.
Сонымен қатар, болгар маманы «Астана» командасының оқу-жаттығу жиындары жайында да айтып өтті.
«Жаңа жылдан кейін команда бірінші рет жаттығу жұмыстарын Дубайда өткізіп жатыр. Бұл жерде біз үшін өте қолайлы жағдай жасалған. Жаттығу жұмыстары жоспарға сай өтуде. Әзірге барлығы көңілімнен шығуда», – дейді бапкер.
Айта кетейік, 26-жастағы колумбиялық футболшы АПОЭЛ сапына 2017 жылдың 31 мамырына дейін жалға берілген.