Астанада «Ауыл» халықтық-демократиялық патриоттық партиясының ұйымдастыруымен Қазақстан Республикасы Президенті Н.Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты Жолдауын талқылауға арналған көнференция өтті.
Елбасы Жолдауы терең талданып, ондағы басымдықтар жөнінде қызу талқыланған басқосуға партия мүшелері, зиялы қауым өкілдері және қала тұрғындары қатысты.
Конференцияға жетекшілік еткен «Ауыл» партиясы төрағасының бірінші орынбасары Толымбек Ғабділəшімов жиын барысында бірінші кезекте Мемлекет басшысының Қазақстан халқына арнаған Жолдауында атап көрсетілген мақсат-міндеттердің маңыздылығына кеңінен тоқталып, аталған құжатта қамтылған міндеттерді халыққа жете түсіндіру қажеттігін сөз етті.
– Жолдауда қамтылған барлық мәселелерді халыққа жете ұғындыруға біздің партиямыз барынша атсалысуы қажет. Өйткені, бұл Жолдаудан туындайтын міндеттердің ойдағыдай жүзеге асуы қарапайым халыққа тікелей байланысты, – деген Т.Ғабділәшімов Жолдауда Елбасы атап көрсеткен əр тапсырманың түпкі мақсаты елімізді экономикалық дамудың жаңа кезеңіне шығару екенін жеткізді.
Жиын барысында Жолдауды кеңінен насихаттауға бағытталған баяндама тыңдалып, ондағы айтылған мәселелерге орай қатысушылар өз ойлары мен ұсыныстарын ортаға салды.
Қорыта айтқанда, конференцияға жиналғандар Жолдаудың мән-маңызының жоғары екенін, оның ел дамуына жаңаша серпін беретінін атап көрсетті. Қатысушылардың айтуынша, биылғы Жолдау – уақыт талабына сай қабылданған маңызды құжат.
Жолдыбай БАЗАР,
«Егемен Қазақстан»