Өткен 25 жылдың ішінде еліміз қарқынды дамыды, жолдар да, тұрғын үйлер де, ғимараттар да салынды, әлеуметтік-экономикалық жағдайымыз көтерілді. Осының бәрі Елбасының көреген саясатының арқасында жүзеге асты.
Әлемде болып жатқан экономикалық жағдайды ескере отырып, Мемлекет басшысы елімізді кезең-кезеңімен дамыту мақсатында «Қазақстан-2050» стратегиясы мен уақыт талабына сай мемлекеттік бағдарламалар қабылдады. Елбасының Жолдауында алдағы бес жылда, он жылда, 30 жылдағы ел дамуындағы басымдықтар айқын белгіленген.
Біздің алдағы міндеттеріміздің бірі халықтың әлеуметтік-экономикалық жағдайын жақсарту, елдегі тұрақтылықты нығайту, әлем қоғамдастығындағы Отанымыздың беделін биіктету болып табылады.
Біздің еліміз әлемде болып жатқан әлеуметтік-экономикалық және саяси мәселелерге ШЫҰ, ЕАЭО, АӨСШК және басқа да халықаралық ұйымдар арқылы үлесін қосып келеді. Биылдан бастап еліміз БҰҰ Қауіпсіздік Кеңесінің тұрақты емес мүшесі лауазамына ие болды. Бұл біздің Елбасымыздың және еліміздің бейбітшіл әрі бітімгершіл саясатының көрінісі дер едім.
Кешелі бері Тұңғыш Президенттің елімізді өркендетуге сіңірген еңбегін Конституцияда атап өту қажеттігі туралы айтылып жатыр. Ол ұсыныстарды толықтай қолдаймын. Сондықтан, Ата Заңымызда Елбасы еңбегін ерекше атап өтуге қолдау білдіремін.
Елбасы, сондай-ақ, еліміздің әлеуметтік-экономикалық жағдайы мен саяси тұрақтылығын айтпағанда, бүкіл әлемдегі халықаралық жағдайдың жақсаруына оң ықпал етіп келеді. Ресей мен Түркияның қарым-қатынасының жақсаруына қосқан үлесін еске алсақ та жеткілікті болар еді. Сондай-ақ, Сириядағы араздықты реттеуге де біздің Елбасымыздың сіңірген еңбегін айтпай кетуге болмайды. Сондықтан, осындай әлемдегі тұрақтылықты нығайтуға, бейбітшілікті орнатуға, бітімгершілікті ілгерілетуге қосқан үлесін ескере отырып, Мемлекет басшысы – Елбасы Нұрсұлтан Назарбаевты Нобель сыйлығына ұсыну туралы ұсынысты қолдаймын.
Ерболат МҰҚАЕВ,
Сенат депутаты