Жоғары хоккей лигасының плей-офф кезеңінде Қарағандының «Сарыарқасы» Чехов қаласында жергілікті «Звезда» командасымен үшінші мәрте кездесіп, 3:2 есебімен басым түсті.
«Звезда» өз жанкүйерлерінің алдында өнер көрсеткендіктен барынша өткір шабуылдар ұйымдастыруға тырысты. Кездесудегі алғашқы гол 22-минутта соғылды. Александр Шаровтың соққысынан кейін айдын иелері алға шықты. Қарқындарын үдеткен олар 37-минутта жерлестерімізді тағы бір мәрте қапы қалдырды. Бұл тұста Андрей Кузьменко мергендігімен көзге түсті. Намысқа басқан қарағандылықтар екінші кезеңнің соңында Михаил Анисиннің көмегімен есеп айырмашылығын қысқартты.
Үшінші кезеңде бас бапкер Вадим Епанчинцевтен жаңа нұсқаулар алған «Сарыарқа» ойыншылары таразы басын теңестіру үшін барын салды. Нәтижесінде, матчтың соңғы минутында Артур Сарваров есепті 2:2-ге жеткізді. Ал овертайм кезінде Олег Ломаконың мерейі үстем болып, жерлестеріміздің кезекті жеңісіне септігін тигізді. Қос команданың арасындағы жалпы есепте «Сарыарқа» 3:1 есебімен алда келеді. Келесі матч Қарағандыда өтеді.
Дәл осы кезеңде Өскеменнің «Торпедосы» да жеңіске жетті. Ижевскіде «Ижсталь» командасымен сынға түскен шығысқазақстандықтар 2:1 есебімен басым түсті.
Жанкүйерлер қызықты ойынның куәсі болғанымен, есеп тек соңғы кезеңде ғана ашылды. Айдын иелері тарапынан бір ойыншының кемдігін ұтымды пайдаланған өскемендіктер айналасы он минуттың ішінде екі бірдей шайба соғып үлгерді. Андрей Белозеров 42-минутта алғашқы голын салса, 52-минутта дубль иесі атанды. Ал «Ижсталь» командасынан Денис Полюдов 55-минутта көзге түсті.
«Торпедо» сериялы матчта үш рет жеңіске жетіп, бір мәрте есе жіберді. Қос команда арасындағы келесі кездесу Өскеменде өтеді.
Аян ӘБДУӘЛИ,
«Егемен Қазақстан»