Әлбетте, Отан қорғаушы дегенде есімізге алдымен ер-азаматтардың түсетіні белгілі. Дегенмен, ел басына күн туған шақта қолына қару алып, ерлермен бірге елін қорғаған арулар қазақтың тарихында қашанда көп болған. Бүгінгі бейбіт күнде де әскери қызметте жүрген аруларымыз жетерлік.
№5517 әскери бөлімінің тәрбие және әлеуметтіқ-құқықтық жұмыстары жөніндегі бөлімше бастығының көмекшісі – психолог лейтенант Айнұр Халилова да әскери қызметші.
Ресей Федерациясының Александр Гай қаласында дүниеге келген Айнұр бала кезінен мұғалім мамандығын меңгеріп, шәкірттерге ұстаздық етуді армандап өсті. Сол арманының жетегімен Орал қаласындағы М.Өтемісұлы атындағы Батыс Қазақстан мемлекеттік университетіне оқуға түсті. 2005 жылы университетті аяқтап, педагог-психолог мамандығы бойынша диплом алды. Алайда, тағдыр Айнұр Зақариянқызының маңдайына мектепте емес, әскерде қызмет етуді жазыпты.
– Орал шаһарындағы №5517 әскери бөлімінде 2010 жылдан бері қызмет етемін. Алғашқы жылда штаттан тыс психолог қызметін атқарып, 2011 жылдың ақпан айынан бастап тәрбие және әлеуметтік-құқықтық жұмыстар жөніндегі бөлімше бастығының көмекшісі-психолог қызметіне тағайындалдым. Психолог – күрделі де қызықты мамандық, ал әскерде психолог болу – екі есе жауапты іс. Этикалық нормаларды басшылыққа ала отырып, әрбір әскери қызметінің жан дүниесін терең түсінуің әрі дұрыс кеңес бере білуің аса маңызды. Маған өз мамандығым ерекше ұнайды, – дейді Айнұр Зақариянқызы.
Отбасын құрып, ұрпақ тәрбиелеп отырған А.Халилованың атқарып жүрген қызметі атап өтуге лайық. Бөлімдегі сарбаздардың моральдық-психологиялық жағдайын қадағалап, тұрақтылығына жауап береді. Оларға әскери өмірге бейімделуіне көмектеседі.Үйренісе алмай жүргендерімен жеке сөйлесіп, туындаған мәселелерді бірге шешуге шақырады.
– Әрине, әскерге жаңадан шақырылған жас сарбаздар түрлі облыстардан жиналады. Сонымен қатар, олардың әртүрлі әлеуметтік топтардың өкілдері болып табылатыны белгілі. Кейбір бозбалалар әскерден бұрын өз отбасынан ешқайда шықпаған болса, тағы біреулері «көше» тәртібімен ержеткен болуы мүмкін. Олардың психологиялық жағдайлары бір-біріне қайшы келеді. Менің міндетім – осы мінез-құлқы әртүрлі сарбаздарды тіл табыстыру, – дейді Айнұр Зақариянқызы.
А.Халилова университетті бітіре сала кіріскен әскери қызметінде еңбеққорлығының арқасында қарапайым қызметшіден алғашқы офицерлік атақ – лейтенант шеніне көтерілді. Басшылық тарапынан бірнеше грамота мен алғыс хаттарға да ие болды.
Ал №5517 әскери бөлімінің тәрбие және әлеуметтік жұмыс жөніндегі бөлім командирінің орынбасары, подполковник Вячеслав Пактың айтуынша, бүгінде қоғамда ерлермен тең деңгейде еңбек етіп жүрген қыз-келіншектер аз емес. Араларында әскери шенділері де жетерлік. Аталған әскери бөлімде қызмет ететін Айнұр Зақариянқызы сынды қыз-келіншектер өздеріне көрсетілген сенімді толығымен ақтауға тырысады. Олар ерлермен тең деңгейде қызмет атқарып, көзге түсіп жүрсе керек. «Аруларымызға Халықаралық әйелдер күні мерекесінде ғана жеңілдік жасаймыз. Мұнда оларға сый-құрмет көрсету дәстүрге айналған», – дейді Вячеслав Олегович.
– Талай ғасырдан бері әйелдер сезімталдықтың, нәзіктік пен мейірімділіктің таңғаларлық қайталанбас бейнесіне айналды. Отбасының жылуы мен жарасымы, туған үйдің тыныштығы, махаббат пен сенім сияқты баға жетпес құндылықтар Ана есімімен тығыз байланысты. Мен де анамын. Қызымның сүйікті мамандығын таңдап, ел қатарлы азамат болғанын қалаймын. Егер ол да әскери мамандықты таңдап жатса, бұл қалауын шын ниетпен құптаймын», – дейді лейтенант А.Халилова.
Сөз соңында айтарымыз, әскери бөлімде сарбаздар үшін аптаның бір күнінде арнайы «Психолог сағаты» белгіленген. Психолог сағатында сар-
баздармен сұхбат жүргізіліп, туындауы мүмкін жанжалдардың алдын алу, ұжымды ауызбіршілікке жұмылдыру мақсатындағы шаралар ойластырылады.
Ерболат МЕРСАЙЫНҰЛЫ,
подполковник
ОРАЛ