Қазақстандық жас әнші Димаш Құдайберген өткен аптада Қытайдағы «I’m a Singer» ән байқауының жетінші кезеңінде өнер көрсетіп, Аспанасты еліне қазақтың әнін танытқан еді.
Бұл күнде Димаш шырқаған «Дайдидау» әні «Азияның жаңа әндері» (Freshasia music) рейтингінде 107 341 ұпаймен 15-орыннан көрінді. Ал оның бұған дейінгі шырқаған «Adagio» мен «SOS d'un terrien en détresse» әндері сәйкесінше 41 және 50-орындарды иеленді, деп хабарлады ҚазАқпарат.
Қазақтың «Дайдидау» әні қытай тілінде де шырқалған. Шыңжаңдық әнші Гао Иін 2012 жылы аталмыш ән қамтылған халық әндері альбомын шығарып, Италияның «Premio Lunezia» сыйлығын жеңіп алған болатын.
Айта кетейік, Димаш Құдайберген 2015 жылы «Славян базары» халықаралық ән байқауында осы «Дайдидау» әнімен бас жүлдеге ие болған.
«Азияның жаңа әндері» рейтингі азиялық әншілердің Қытайдағы танымалдылығына байланысты жасалады. Онда әндердің тыңдалымы, ақылы түрде жүктеп алынуы бойынша ұпайлар беріліп, рейтинг құрылады. Ол әр 10 минут сайын жаңартылып, жыл соңында үздік рейтинг жарияланады.