«Қайратқа» жақында ғана қосылған жартылай қорғаушы Георгий Жуков «Оқжетпеске» қарсы ойын және командадағы өзінің орны туралы пікір білдірді.
«Оқжетпеске» қарсы матчта алаңның сол қапталында ойнадым. Бұл жерде бұрын ойнап көрмегендіктен, өзімді жайсыз сезінгенім рас. Әдетте мен орталық жартылай қорғанысқа жауапты болатынмын. Өзімді бұл жолы жақсы қырымнан көрсете алмағаным анық. Бірақ бапкерім нені міндеттесе, соны орындауға тиістімін», – деді Георгий Жуков.
Өткен турда Жуковтың орнына алаңға Ойбек Балтабаев шыққан болатын. «Жаттықтырушылар бұл туралы маған ешнәрсе айтпады. Шамасы, олар менің орталық жартылай қорғаушы екенімді білмейтін секілді. «Астанада» жүргенімде алаңның орталық бөлігінде ойнайтынмын. Алматыда бәрі басқаша. Бапкерлерімнің мұндай шешімі маған ұнамайтынын айтқым келеді», – деді ол.
«Бірақ жаттықтырушыммен сөзге келген емеспін. Ол шешім қабылдайды, мен орындауым қажет. Қолымнан келгенше тырысып жүрмін», – деді Жуков.
Ішкі біріншіліктің бастапқы екі турынан кейін Қазақстан ұлттық құрамасының ойындарына шақырту алғандар Талғарда бас қосады. Қазақстан сапында ойнаудан бас тартқан Георгий бірер ай бұрын бұл ұсынысты қабыл алуға дайын екенін мәлімдеген-ді.
«Маған ұлттық құрамада ойнау жөнінде ұсыныс келді. Ойланбастан қабыл алдым. Енді Талғардағы жиынға аттанамыз. Қазақстан құрамасының ойындарын асыға күтіп жүрмін. Бұл матчтар тартысты өтетіні сөзсіз. Негізгі құраммен шығу үшін, командамның жеңіске жетуі үшін бар күшімді саламын. Физикалық тұрғыдан да, психологиялық жағынан да бәріне дайынмын», – деді «Қайрат» ойыншысы.