Жанкүйерлер тартысты бәсекенің куәсі болды. Армения құрамасы ойын бастала сала алға ұмтылып, жерлестерімізді қыспаққа алумен болды. Алайда, армяндар сапынан негізгі ойыншылардың бірі Кеворг Газарян алғашқы шабуылдардың бірінде-ақ қақпашы Давид Лориямен допқа таласта жарақат алып, алаңнан кетуіне мәжбүр болды.
Кездесудің бірінші таймында алаң иелері сапынан Генрих Мхитарян, Қазақстан құрамасынан Еркебұлан Тұңғышбаев сынды футболшылардың есеп ашатын мүмкіндіктері болған, бірақ сәттілік жетіспеді.
Александр Бородюктен жаңа нұсқау алған футболшыларымыз матчтың екінші бөлігін ширақ бастады. Допқа көбірек иелік етіп, ара-тұра қауіпті шабуылдар да ұйымдастырды. Алайда, 64-минутта жағдай күрт өзгеріп сала берді. Сергей Малый Генрих Мхитарянға қарсы ойын тәртібін бұзғаны үшін екінші сары қағазын алып, алаңнан қуылды. Міне, осыдан кейін қорғанысымыз да сыр бере бастады. Алаң иелері емін-еркін шабуылға көшті. Нәтижесінде, 73-минутта есеп ашылды. Генрих Мхитарян екі-үш футболшының арасынан Давид Лорияның қақпасын дәл көздеп, өз ұжымын алға шығарды. Көп ұзамай армениялықтар жерлестерімізді екінші мәрте қапы қалдырды. 75-минутта оң қапталдан әуелей келген допты Араз Озбилиз тоқтатпастан қақпаға тура бағыттады. Есеп 0:2.
Осылайша, Александр Бородюктің Қазақстан құрамасымен алғашқы ресми ойыны жеңіліспен аяқталды. Отандастарымыз 2 ұпаймен Е тобында көш соңында, яғни 6-орында келеді. Ал еншісінде 6 ұпайы бар Армения – 5-орында.
Аян Әбдуәли, «Егемен Қазақстан»