Реформалар жүзеге асырыла бастады

Жиынды «Астана» халық­­ара­лық қаржылық орталы­ғы­ның атқарушы директоры Саясат Нұрбек ашып, жүргізіп отырды. 

Кездесуге қатысқан ҚСЗИ директоры Зарема Шаукенова өзінің сөзінде Пре­зидент Нұрсұлтан Назарбаев қол қойып, 10 наурызда күшіне енген конс­­­­т­итуциялық реформалар­ды шарт­ты түрде үш кате­горияға бөлу керек­­тігін атап өтті. Олар: Пар­ламент өкі­леттігінің артуы; Үкімет­тің жауап­кер­шілігі мен өкілет­тігінің өсуі; және Азаматтар құқықтарының кеңеюі; Осы үш категорияның әрқайсысы да елдің демократиялық дамуына жол аша­тындығымен маңызды екендігін ше­шен өзінің сөзінде дәлелдеп беруге тырысты.

Сараптамалық кездесуге қа­тыс­қан ғылыми-зерттеу инсти­тут­тары­ның басшылары, белгілі қоғам және ғылым қайраткерлері, сарапшылар конс­титуциялық ре­форманың маңызы мен тиім­ділігіне тоқ­талып, өз ойларын ортаға салды. Соның ішінде Үкі­­мет пен Парламенттің өкілет­тіктері­нің артқандығы еліміз­де дамып келе жатқан демо­кра­тиялық үдерістерге сай екендігі аталынып өтті. Ендігі міндет конституциялық реформаны тиім­ділікпен іске асырып, оны қоғам дамуы­на қызмет еткізуге ат­салысу екендігі жеткізілді.

«Астана» халықаралық қаржы ор­талығының (АХҚО) жұмысы туралы да кең көлемдегі ақпараттар айтылды. Бұл институт Мемлекет басшысының бастамасымен еркін қаржылық аймақ құру мақсатымен құрыл­ғаны сөз болып, енді оны конс­титуциялық жаңғыруға сәйкес заң­дылық тұрғыдан жетілдіру мәсе­лесі алда тұрғаны атап өтілді. Ол шетелдік инвестициялар­ды тарту мақсатымен құрылған. Өзінің сөзінде Саясат Нұрбек халық­ара­лық қаржылық орталықтар саны­ның бүгінгі таңда артып отыр­ғанын атай келіп, олардың ара­сындағы бәсекелестік те өсіп отырғанын сөз етті. Барлық елдерде шетелдік инвесторлар өздерінің инвестицияларының құқықтық тұрғыдан қорғалып, саяси тұрғыдан кепілдіктер бері­луін қалайды. Біздің орталық осы талаптың үдесінен шыға біл­се ғана бәсекелестікке төтеп бере алады. Сондықтан, АХҚО-ның негізгі міндеті халықаралық құқық шеңберінде инвес­тицияларды қорғаудың халықаралық стан­дарт­тарын қамтамасыз ету. Оның бұл мәртебесі Конститу­ция­ның арнайы нормасымен бекі­тілген, деді ол.

Жақсыбай САМРАТ,

«Егемен Қазақстан»