Басқосуға Мәжіліс депутаттары, танымал саясаттанушылар, азаматтық сектор өкілдері, әлеуметтік желілерді белсенді пайдаланушылар қатысты. Шараны ұйымдастырушылардың айтуынша, Кәсіподақтар федерациясы орталықта және жергілікті жерлерде азаматтық сектор, әлеуметтік желілер, қоғамдық пікірдің белсенді көшбасшыларын тарту арқылы «медиаторлар пулын» құрып, әлеуметтік медиация жұмыстарының маңыздылығын арттыруды жоспарлауда.
Жиынды ашып, сөз сөйлеген федерация төрағасы Әбілғазы Құсайынов Мемлекет басшысы Нұрсұлтан Назарбаевтың Қазақстан халқына арнаған Жолдауында адами капиталды дамыту негізгі басымдықтардың бірі ретінде атағандығын еске салып өтті. «Бұл процесте әлеуметтік медиация тетіктерін енгізу қадамдары маңызды рөл атқарады. Менің ойымша, аталған мәселені қоғам арасында салмағы бар, өз ойын ашық айта алатын азаматтармен келісе отырып шешкен оңтайлы болады», деді ол.
Шараға қатысушылар елдегі адами капиталды дамыту мен әлеуметтік тұрақтылықты сақтау бағытында бірқатар нақты шараларды ұсынды.
Жаңа құрылған кеңестің басшылығына белгілі саясаттанушы Ерлан Саиров сайланды.
Асхат РАЙҚҰЛ,
«Егемен Қазақстан»