Әзербайжанның мемлекеттік ақпарат агенттігі – AzerTac өз кезегінде «Нұрсұлтан Назарбаев латын әліпбиіне көшу туралы тапсырма берді» деп хабар таратты. Елдегі ең көп оқылатын басылымдардың бірі Şərq газеті Әзербайжанның бұрынғы білім министрі, түркітанушы, профессор Феридун Джелиловтің мына пікірін келтіреді:
«Әрине, Қазақстанның бұл бастамасы өте құптарлық қадам. Енді бауырлас елдер арасында әріп кедергісі жойылып, білім беру саласы, әдебиет пен ғылымда байланыс нығая түседі, мәдени қатынастарымыз бекиді. Қазақ әдебиетімен біз бұрынғыдан да жақын танысатын боламыз. Бұрын біз Орталық Азия әдебиетін кирилл әріптерімен оқуға мәжбүр едік. Енді бұл кедергіден құтылатын болдық. Тарихи ортақ әдеби құндылықтарымыз қайта жаңғыра түседі. Біз де әліпбиді ауыстырғанда кітаптар мен мерзімді басылымдарымызды жаңарттық. Қазақстан да осы жолдан өтеді. Әрине, қиындықтар болады. Бірақ уақыт өте келе барлығы орнына түседі. Қазір әлем латын әріптеріне бет бұруда».
Сонымен қатар, Қазақстандағы «Бұл бастаманың түпкі мақсатында не жатыр?», «Жергілікті халық бұған қалай қарайды?» деген сауалға жауап іздеген басылым Әзербайжан Парламенті төменгі палатасының депутаты, бұқаралық ақпарат құралдары саласындағы белгілі сарапшы Айдын Мирзезаденің мына сөзімен бөліседі:
«Қазақстан Әзербайжанмен дос мемлекет және арамызда кең байланыс бар. Бір-біріміздің жетістіктерімізге қуанумен қатар, сын сағатта қолұшын беруге әрдайым әзірміз. Түркітілдес елдердің басым көпшілігі латын әліпбиін қолданады. Қазақстан осы бағытта ұзақ уақыттан бері жұмыс істеп келеді. Енді Қазақстан Мемлекет басшысы 8 жыл ішінде латын әліпбиіне көшу туралы нақты тапсырма бе рді.
Қазақстан қазіргі таңда тұрақты да тату ел ретінде қалыптасып болды. Латын әліпбиіне көшудегі басты мақсат – әлемдік қоғамдастыққа бір табан жақындай түсу, түркі халықтарының бірлігін нығайта түсу».
Жергілікті APA агенттігі мен APA TV арнасы Нұрсұлтан Назарбаевтың «Егемен Қазақстан» газетінде жарияланған мақаласын мазмұндай келе, Елбасының жоғарыдағы шешімін «тарихи қадам» деп бағалады. «Назарбаев тарихи қадам жасады. Қазақстан латын әліпбиіне көшеді» деген атпен шыққан бас мақалада Қазақстандағы осы өзгеріс жан-жақты талданады.
Ал Moderator.az порталы «Қазақстанның латын әліпбиіне көшуі түркі халықтарына ортақ жазу қалыптастыруға түрткі бола ала ма?» деген сауалға жауап іздейді.
«Ерте ме, кеш пе, түркі елдері ортақ әліпбиге ауысады» деген тақырыпта жарияланған мақалада «Бұл – біздің көптен күткен жаңалығымыз. Қазақстан мұндай қадамға баруы арқылы үлкен батылдық танытып отыр. Осыдан 20-25 жыл бұрын мұндай бастама көтеру мүмкін емес еді. Бүгінде уақыт дегенін істеді. Барша түркі елдеріне ортақ әліпби жасаудың негізі қаланды. Бұл қадам саяси тұрғыда да өте маңызды», делінген мақалада.
Sputnik Azerbaycan агенттігі Мемлекет басшысының «Егемен Қазақстандағы» мақаласынан үзінді ала отырып, латын әліпбиіне көшу туралы бастама Қазақстанды әлемдік өркениетке жақындата түсу және келешек ұрпақтың ағылшын тілін үйренуіне барынша қолайлы жағдай жасау жолы екенін айтады.
Физули МЕДЖИДЛИ,
арнайы «Егемен Қазақстан» үшін