Мұны айтып отырған себебіміз, бұл үшін ең алдымен құрылыс жұмыстары кеңінен қарқын алып, қанат жаймақ. Бүгінгі заманғы қала құрылысы өте күрделі, әрі жан-жақты ойластырылған сапалы да сәнді сәулеттік шешімдерді талап етеді. Әйтсе де облыста бас сәулетші штаты мен қызметі қарастырылмаған. Осындай кереғарлық жөнінде облыс әкімдігі жанындағы қала құрылысы кеңесінің мәжілісінде ашық айтылды.
Гәп мынада деуге болады. Бұған дейінгі жылдарда еліміздің барлық дерлік облыстарында сәулет және қала құрылысы құрылымы дербес басқарма, бөлек ведомство ретінде іс-қимыл танытып келді. Алайда, кейінгі екі-үш жылдың бедерінде өңірлердегі сәулет басқармалары қысқартылды да, құрылыс басқармасының құрамына қосылды. Әрине, мұндай өзгеріспен оңтайландырудың өзі бюджет қаражаттарын үнемдеу мен тиімді түрде жұмсау қажеттілігінен туындағаны талассыз.
Осы ыңғаймен қарастырғанда қазіргі жағдайда облыстың бас сәулетшісі деп жүргеніміз – Ақтөбе облыстық құрылыс, сәулет және қала құрылысы басқармасының басшысы Серік Төленбергеновтің орынбасары болып табылады екен. Әрі мұның өзі нақты мәртебесі айқындалмаған, бардың да қатарынан көрінбейтін, жоқтың санатынан кездеспейтін қызмет болып шықпай ма?
Әрине, қоғамдық өмір не нәрсеге болса да өзінің өзгерісін енгізбей тұра алмайды. Барлық өңірде бірізділік болуы шарт па екен?! Дегенмен, Ақтөбе секілді жыл сайын құлашын кеңге жайып, өсіп-өркендеп, жедел қарқынмен дамып келе жатқан өңірде бұған дейінгі сәулет және қала құрылысы секілді басқару құрылымын қайтадан орнықтырған жөн секілді. Қалай десек те, агломерациялық аймақта қайта қалпына келген құрылымнан тиісті қайтарым болары анық.
Темір ҚҰСАЙЫН,
«Егемен Қазақстан»
Ақтөбе облысы