Жүздесу барысында екі бауырлас қаланың ынтымақтастық перспективалары, соның ішінде Астанада ЭКСПО-2017 халықаралық мамандандырылған көрмесі кезінде Бейжің күндерін өткізу жайы талқыланды.
Ә.Исекешев Қытайдың Қазақстандағы туризмінің жылы шеңберінде іскерлік және мәдени байланыстарды кеңейтуде туристік саланың әлеуеті зор екенін атап көрсетті және Бейжің туристерін ЭКСПО-2017 көрмесіне шақырды.
ҚХР Халықаралық сауданы қолдау жөніндегі комитетінің ақпаратына сәйкес, ЭКСПО-2017 шеңберінде 300 000-ға жуық турист Қазақстанға сапарлап келуді жоспарлап отыр. 2017 жылғы 16-18 маусымнан бастап Бейжіңнің Астанадағы күндерінен бастап үш ай ішінде Қытайдың 22 провинциясының делегациялары өз экспозицияларын ұсынып, өздерінің іскерлік әлеуеті мен мәдениетін таныстырмақ.
Ә.Исекешев пен Цай Ци, сондай-ақ елордада Қазақстан-Қытай жобаларының бірі болып табылатын жеңіл рельсті көлік (LRT) құрылысын іске асыру жайын талқылады. Бұдан басқа, әкім Астана мен Бейжің арасында көлік басқару саласында тұрақты әріптестікті және тәжірибе алмасуды жолға қоюға мүдделілік танытты.
Сондай-ақ, қалалар басшылары экономика саласында ынтымақтастықты арттыру бойынша бірқатар бағытты белгіледі. Сонымен қатар, Ә.Исекешев Бейжіңнің көлік жүйесін басқару орталығында болып, Қытай астанасында ірі шараларды өткізу кезінде көлік жұмысын ұйымдастыру жайымен танысты.
Сапары шеңберінде Астана әкімі, сондай-ақ, көлік, құрылыс, индустриялық парктерді, «смарт»-технологияларды дамыту, спорт нысандарын басқару салаларындағы Қытайдың жетекші компанияларының өкілдерімен кездесті. Бұған қоса, Ә.Исекешев ШЫҰ Хатшылығында болып, ұйымның Бас хатшысы Рашид Алимовпен Астананың аталған бірлестікпен ынтымақтастық мәселелерін талқылады.