10 сәуір күні 23 сағат 10 минутта облыстық төтенше жағдайлар департаментіне Атырау қаласы Құнанбаев көшесі, 28 үйде орналасқан супермаркетке жарылғыш зат қойылғаны туралы телефон қоңырауы келіп түскен.
Көрсетілген мекенжайға арнайы қызмет өкілдері жедел жетіп, супермаркет қызметкерлері мен үй тұрғындарын қауіпсіз жерге шығарды. Алайда, тексеру кезінде ешқандай жарылғыш зат табылмады. Хабарламаның жалған екені анықталды.
– Жедел іздестіру шараларының нәтижесінде күдікті азамат ұсталды. Аталған үйдің ауласында ішімдік ішкен ол мас күйінде құқық қорғау қызметкерлерінің назарына іліккен. 1989 жылы туған азамат бұрын ұрлық жасап, сотталған. Кінәсін мойындап, түсініктеме берді. Қазір ҚР ҚК-нің 273-бабы бойынша сотқа дейінгі тергеу жүргізіліп жатыр, – дейді облыстық ішкі істер департаменті баспасөз қызметінің жетекшісі Гүлнәзира Мұхтарова.
Бақытгүл БАБАШ,
«Егемен Қазақстан»
АТЫРАУ