Атырау облысында өткен жылы сыртқы тауар айналымы 13 млрд АҚШ долларына жетті. Өнеркәсіптік өндіріс 4,4 трлн теңгеге бағаланды. Инвестиция тартуда мұнайлы өңір көш бастап келеді. Жалпы, өңірлік өнім мен орташа еңбекақы мөлшері бойынша да облыс алдыңғы қатарда. «ATYRAU INVEST-2017» халықаралық форумында қазыналы мекеннің бүгінге дейін қол жеткізген табыстары мен жетістіктері көпшілік назарына ұсынылды. Шара аясында облыс әкімдігі 3,3 млрд АҚШ долларын құрайтын 9 меморандумға қол қойды. Бұл – әлеуметтің әлеуетін көтеріп, ел экономикасын дамытуға бағытталған тағы бір қадам.
– «ATYRAU INVEST-2017» халықаралық форумының мақсаты – облыстың инвестициялық мүмкіндігімен таныстыру, инвестицияларды облыс экономикасына және нақты инвестицияларға тарту, − дейді өңір басшысы Нұрлан Ноғаев. – 20 мемлекеттің өкілі, жүзден астам компанияның басшылары мен қызметкерлері келді. Орталық және жергілікті мемлекеттік мекемелер, ұлттық компаниялар мен даму институттарының, еліміздегі дипломатиялық өкілдіктердің өкілдері және шетелдік, отандық инвесторлар да шараға куә болды. Көрмеге қатысушылар өз өнімдері мен көрсететін қызметтерін көпшілікке ұсынды. Бұл жаңа жоба бастауға ниетті атыраулық кәсіпкерлер үшін де жақсы мүмкіндік. Ал инвесторлар мұнай-газ саласында, экономиканы әртараптандыру бағытында жүзеге асып жатқан шаралардан хабардар болды.
Атырау облысындағы инвестициялық ахуалдың тұрақтылығы ірі компаниялар тарапынан қызығушылыққа ие. Олар қаражат салып, қайтарымын көруге ынталы. Осы инвестициялық форумда мұнай-химия паркінің аясында жүзеге асырылатын 620 млн теңгенің жобасын атқаруға меморандумға қол қойылды. Жергілікті жерде агрессивті ортадағы металды тот баспау технологиясы бойынша жұмыстар қолға алынып жатыр. Облыс әкімінің айтуынша, инвесторлар тек мұнай-газ саласы ғана емес, өнім өндіру, ауыл шаруашылығы бағыттарына да қызығушылық танытқан. Шетелдік және отандық инвесторлардың басқосуы өзара тиімді келісімдерге жол ашады, бірлескен кәсіпорын құруға мүмкіндік береді. Қазір облыста осындай мыңнан астам компания табысты еңбек етіп жатыр.
Форумға қатысқан «ҚазЭнерджи» қауымдастығы төрағасының орынбасары Ұзақбай Қарабалин озық технологиялар мен инновациялар арқылы ғана биіктен көрінеміз деген ойын айтты. Ал Германияның Қазақстандағы консулы Йорн Розенберг «Биыл екі ел арасындағы дипломатиялық қарым-қатынастың орнағанына 25 жыл. Германия үшін Қазақстан Орталық Азиядағы басты экономикалық әріптес саналады. Көмірсутегі шикізатына бай Атырау облысының да орны бөлек. Жергілікті басшылықтың қолдауымен іскерлік байланыстар орнатуға ыңғайлы орталық қалыптасқанына қуанамыз», деді. Бельгия Корольдігінің Қазақстандағы төтенше және өкілетті елшісі Мишель Петерманс екі ел арасындағы байланыстың жылдан-жылға нығайып келе жатқанын атап айтты.
16-шы Солтүстік-Каспий құрылыс және интерьер көрмесіне арнайы келгендердің қатарында Түркияның «КыванчГруп» компаниясы да бар. Бұған дейін Ақтау қаласына өнімдерін ұсынып келе жатқан кәсіпорын енді Атырауда бөлімшесін ашуға ниетті. «1980 жылы негізі қаланған шағын бизнес бүгінде үлкен компаниялар тобына айналды, − дейді «КыванчГруптың» Азия елдеріндегі сату бойынша менеджері Серкан Йылдырым. – Біздің киімдеріміз өте ыңғайлы, сәнді. Тігін индустриясында өзіндік орны бар кәсіпорын өндіріс ауқымын кеңейтуді жоспарлап отыр».
Жалпы, Атырау облысында индустрияландыру бағдарламасы аясында өткен жылы 7 жоба жүзеге асты. «Биыл төрт жобаның жұмысы басталады. Олар: роботты дәнекерлеу тәсілі арқылы металқұрастырмалар дайындау өндірісі, фармацевтика зауыты, балық өсіретін тоған шаруашылығы, макарон өндіру цехы. Бұдан бөлек құны 14 трлн теңге болатын, 20 мыңнан астам жұмыс орнына есептелген 20 инвестициялық жоба жүзеге асырылады. Теңіз кенішін кеңейту жобасы шеңберінде атқарылар жұмыстардың нәтижесінде мұнай өндірісінің көлемін 27-ден 39 млн тоннаға ұлғайтуға жол ашылады», деп атап өтті облыс әкімі Н.Ноғаев.
Өткен жылдың қорытынды көрсеткіштеріне зер салсақ, облыстағы шағын және орта бизнеспен айналысатын тұрғындар саны 7,9 пайызға артып, 128,7 мың адамды құраған. Бұл өңірде экономикалық белсенді халықтың 41 пайызы осы салаға жұмылдырылғанын көрсетеді. Ал халықаралық инвестициялық форум сынды шаралар ел игілігіне елеулі үлес қосатынымен ерекше.
Бақытгүл БАБАШ,
«Егемен Қазақстан»
АТЫРАУ