Қазақстан Республикасындағы «Мицва» еврей ұлттық ұйымы Байланыс және ақпарат министрлігінің Ақпарат және мұрағат комитетімен бірлесіп Мемлекеттік орталық мұражайдың қолдауымен V халықаралық ғылыми-тарихи конференция өткізген-ді. Сол конференция құжаттары негізінде жарық көрген «Тарих. Естелік. Халық» атты кітаптың тұсауы Алматы қаласында кесілді.
Кітапта Ұлы Отан соғысы жылдары күштеп жер аударылған еврей ұлты өкілдерінің қилы тағдыры ғана емес, сол кезеңде басқа өңірлерде мәжбүрлеп тұрғызылған өндіріс нысандары, орталықтың саясатын насихаттау үшін салынған мәдени ошақтар, қуғын-сүргінге ұшыраған жергілікті халықтың өмірі мен тартқан зардабы жайлы тың деректер молынан қамтылған. Сондай-ақ Президент мұрағатынан алынған деректерге сүйене отырып, 1941 жылы қазақ аспанында болған аса ірі әуе апатының себебі мен салдарын, бүгінгі азаматтық авиацияның ахуалын көтерген көлемді еңбек те осы жинақта. Кітап «1940 жылдарғы күштеп жер аудару ісінің тарихы» және «Қазақстан еврейлерінің тарихы» атты екі бөлімнен тұрады.
Тұсаукесерде «Мицва» ассоциациясының төрағасы А.Барон, демограф-ғалым М.Тәтімов, мұражай ісінің маманы Б.Нәсенов секілді бірқатар азаматтар халықаралық конференцияның көтерген тақырыптары мен келтірген деректерінің құндылығына баға берісіп, саяси қуғын-сүргінге ұшыраған тағдырлас ұлттардың бүгінгі Қазақстан мемлекетіндегі жайма-шуақ тіршілігін тілге тиек етісті.
Қанат ЕСКЕНДІР.
Алматы.