Қазалы ауданының әкімі Нажмадин Шамұратов Желтоқсан оқиғасына қатысқан қазалылық азаматтармен кездесіп, сый-құрмет көрсетті, деп хабарлады аудан әкімдігінің баспасөз қызметі.
«Сіздер Желтоқсан оқиғасында қазақтың рухы күшті, өр, намысты халық екендігін айдай әлемге таныттыңыздар. «Ер есімі - ел есінде» дегендей, Желтоқсан оқиғасына қатысқан Қазалының сол кездегі 17-18-дегі өрімдей жастары, бүгін кемел жасқа келдіңіздер. Әр салада қызмет етіп, ел мен жердің өркендеуіне үлес қосып жатырсыздар», - деді аудан әкімі.
Кездесу барысында Желтоқсан оқиғасына қатысушылар А.Қожақова, Ұ.Алматова, Ж.Нұрмашева, А.Машай желтоқсандықтарға аудан басшылығының тарапынан көрсетіліп жатқан қолдауға ризашылықтарын білдірді.