Гамбургте ашылған Еуропадағы қауіпсіздік және ынтымақтастық ұйымына (ЕҚЫҰ) мүше елдер Сыртқы істер министрлерінің жыл сайынғы кеңесі алдында Қазақстан Республикасының Сыртқы істер министрі Ерлан Ыдырысовтың қатысуымен «С5+1» пішімінде Орталық Азия елдері мен АҚШ сыртқы саясат ведомстволары басшыларының кездесуі болып өтті, деп хабарлады Қазақстан Республикасы Сыртқы істер министрлігінің баспасөз қызметі.
Қазақстан делегациясының басшысы, сондай-ақ, Ұжымдық қауіпсіздік туралы шарт ұйымына (ҰҚШҰ) мүше елдер Сыртқы істер министрлерінің дәстүрлі кездесуіне де қатысты.
«С5+1» кездесуін аша келіп, АҚШ-тың Мемлекеттік хатшысы Джон Керри әріптестерін Тәуелсіздіктің 25 жылдығымен құттықтады және АҚШ тарапының өңірмен ынтымақтастыққа үлкен маңыз беретінін атап көрсетті. Ол өңірдегі барлық елдермен өзара ашық үнқатысу қалыптастырылып отырғанын айта келіп, көпжақты әріптестіктің тиімді жақтары туралы әңгіме қозғады.
Е.Ыдырысов Астананың Орталық Азиядағы өңірлік ынтымақтастықты нығайтуға бағыт ұстанатынына тоқталды. Осы ретте ол Қазақстанның БҰҰ Қауіпсіздік Кеңесіндегі жұмысында да аталған мәселеге баса назар аударатынын көлденең тартты. Бұл жерде Е.Ыдырысов америкалық әріптесінің өңірдегі әріптестікті ынталандырудың маңызды екеніне қатысты пікірімен келісетінін білдірді. Осы арада, «С5+1» алаңын пайдаланудың да маңызы зор екеніне назар аударды.
Кездесуге қатысушылар, сондай-ақ, қауіпсіздік, терроризммен күрес, сауда-саттық, көлік, экономика және энергетика салаларындағы бірлескен жобаларды жүзеге асырудың жолдарын талқылады. Кездесу барысында қатысушылар «С5+1» шеңбе- ріндегі өзара іс-қимыл аясын кеңейтуге байланысты пікірлерімен алмасты. Өңірдегі су-энергетикалық кешенге қатысты мәселенің көкейкестілігі атап көрсетілді.
Тұтастай алғанда, сыртқы саясат ведомстволарының басшылары үнқатысу алаңындағы байланыстардың даму қарқынына қанағаттанатындықтарын білдірді. Мәселен, «С5+1» іске қосылған 2015 жылдың қарашасынан бері министрлік деңгейінде төрт кездесу өткен. Дж.Керри алаңды дамыту перспективаларын оң бағалап, АҚШ-тың жаңа әкімшілігімен қол жеткен уағдаластықтарды нығайту бойынша өзінің жұмыс істеу ниеті бар екенін мәлімдеді.
ҰҚШҰ-ға мүше елдер сыртқы істер министрлерінің кездесуіне Армения, Беларусь, Қазақстан, Қырғызстан, Ресей және Тәжікстан сыртқы саясат ведомстволарының басшылары қатысты. Олар «ЕҚЫҰ-ның жалпыеуропалық қауіпсіздік жүйесіндегі тиімділігін арттыру туралы» бірлескен мәлімдемені қуаттады. Құжатта жалғасып келе жатқан жалпыеуропалық қауіпсіздік жүйесіндегі дағдарысқа алаңдаушылық білдіріледі. Жағдайды халықаралық терроризм мен ұйымдасқан қылмыс, миграциялық дағдарыс күрделендіре түсіп отыр. Осы орайда, 2010 жылы Астанада өткен ЕҚЫҰ саммитінде алға қойылған міндеттерді пайдалану өз тиімділігін берген болар еді.
Кездесуге қатысушылар, сондай-ақ, 26 желтоқсанда Санкт-Петербургте өтеді деп жоспарланып отырған ҰҚШҰ Ұжымдық қауіпсіздік кеңесінің кезекті сессиясына дайындық мәселесін қарастырды.
Ал 8-9 желтоқсан күндері Е.Ыдырысов ЕҚЫҰ Сыртқы істер министрлері кеңесінің 23-ші отырысына қатысты. Шара, жоғарыда атап көрсеткеніміздей, Германияның Гамбург қаласында өтті. 2016 жылы ЕҚЫҰ-ға неміс тарапы төрағалық етуде. Төрағалықтың ұраны «Үнқатысуды жаңартып, сенімге қайтадан иек арту және қауіпсіздікті қалпына келтіру» болды. Осы орайда, кездесуге қатысушылар еуроатлантикалық және еуразиялық қауіпсіздік жүйесінің көкейкесті мәселелері мен ұйымға мүше елдер арасындағы сенімді қалпына келтіру жолдарын талқылады.
Өзінің сөзінде Е.Ыдырысов Қазақстанның ұйымға қатысты көзқарасын ұсынды. Сондай-ақ, еліміздің ұйым қызметіндегі басымдықтарын белгілеп берді. Қатысушы елдерді 2010 жылы ЕҚЫҰ-ның Астанада өткен саммитінде қабылданған декларацияның ережелерін жүзеге асыруға шақырды. Еске сала кетсек, Астана декларациясында қоғамдастықтың қазіргі заманғы сын-қатерлерге лайықты қарсы тұруға қабілетті көзқарасы айқындалған болатын. Қазақстан сыртқы саясат ведомствосының басшысы аталған мәселеге орай ЕҚЫҰ ХХІ ғасырдың сын-қатерлеріне тиімді жауап қайтарып, дағдарысты жағдайдан шығудың жолдарын көрсете білуі керектігін атап өтті. Бұл үшін ұйым институттары мен құрылымдарының жұмысын жетілдіру қажет.
Гамбургте Е.Ыдырысов ЕҚЫҰ қазіргі төрағасының бастамасы – «Еуропаның қауіпсіздігі үшін қару-жараққа бақылау орнатудың өзектілігі» тақырыбында өткен шараға қатысты. Бұдан бөлек, ол ЕҚЫҰ-ның Бас хатшысы Ламберто Заньермен дәстүрлі кездесу өткізіп, оны ЕҚЫҰ-ның Астанада өтетін ЭКСПО-2017 көрмесіне арналған экономикалық-экологиялық конференциясына қатысуға шақырды.
ЕҚЫҰ-ның Демократиялық институттар және адам құқықтары жөніндегі бюросының директоры Михаэль Линкпен кездесуінде тараптар жеккөрушілік, исламофобия және этностық, діни төзбеушіліктің басқа да түрлері негізіндегі қылмыспен күрестің маңызын талқылады.
Сыртқы істер министрлері кеңесінің алаңдарында Е.Ыдырысов, сондай-ақ, Австрия, Әзербайжан, Андорра, Армения, Бельгия, Венгрия, Германия, Грузия, Испания, Италия, Моңғолия, Ресей, Португалия, АҚШ және Франция делегацияларының басшыларымен кездесіп, халықаралық саясаттың және екіжақты ынтымақтастықтың көкейкесті мәселелерін талқылады. Бұл жерде шетел бизнесі мен мемлекеттік құрылымдарының Астанада өтетін ЭКСПО-2017-ге қатысулары мен Қазақстанның 2017-2018 жылдарда БҰҰ Қауіпсіздік Кеңесіндегі жұмысына байланысты мәселелер де назардан тыс қалған жоқ.