Полицияның жұмысы қашанда қарбаласқа толы. Қазіргі жағдай тәртіп сақшыларына өте қырағы әрі сақ болуды қажет еді. Өз кезегінде мемлекет те қоғамның тыныштығы мен қауіпсіздігін қамтамасыз етіп жүрген полицияның жағдайын жасаудан еш аянып қалған емес.
Міне, ел Тәуелсіздігінің 25 жылдық мерекесі қарсаңында Жамбыл облысының әкімі Кәрім Көкірекбаев жергілікті полиция қызметкерлеріне жаңа 83 қызметтік көліктің кілтін табыс етіп, тәртіп сақшыларының мерейін көтеріп тастады.
– Биыл барлық облыстарда тәртіп сақтау мен құқық бұзушылықтар профилактикасын жүзеге асыратын жергілікті полиция қызметі құрылды, – деді Кәрім Көкірекбаев. – Оларға жеке әкімшілік ғимарат бөлініп, оған жөндеу жұмыстары жүргізілді. Ағымдағы жылдың он айында өңірде тіркелген қылмыстық құқық бұзушылықтардың көрсеткіші 11 пайызға төмендеді. Сондай-ақ, аса ауыр қылмыстар, қоғамдық орындарда, көшелерде жасалатын және бөтен мүлікті ұрлау деректері азайды. Бұл, әрине, профилактикалық жұмыстардың күшейіп, қылмыстардың алдын алуға тиімді істердің өз деңгейінде атқарылып жатқандығын көрсетеді. Ол үшін бізде барлық мүмкіндіктер бар.
Ағымдағы жылы ішкі істер департаментіне 6 миллиард теңгеге жуық қаражат бөлінсе, оның ішінде жергілікті полиция қызметін қаржыландыруға 557 миллион теңге қаралды. Жаңа 83 көліктің 70-і жергілікті полиция қызметіне берілсе, қалған 13-і жедел басқару орталығына табысталды. Ал Жамбыл облыстық ІІД басшысы, полиция генерал-майоры Тілеген Маткенов қылмыспен күресуде жұмыс тиімділігін арттырып, полицейлердің сапалы қызмет атқаруы үшін облыс басшылығының үнемі көмек көрсетіп келе жатқанын айтып, алғысын білдірді.
Оралхан ДӘУІТ,
«Егемен Қазақстан»
Жамбыл облысы