Елімізде ауа райының қолайсыздығынан үш өңірде автожолдар жабылды, деп хабарлады ІІМ төтенше жағдайлар қызметі.
Осылайша, Астанада 10 желтоқсан күні сағат 18:00-ден бастап, Астана-Көкшетау бағыты бойынша барлық көлік түрлері үшін жолдар жабылды. 11 желтоқсан, сағат 13:40-тан бастап, Астана-Павлодар, сағат 15:30-дан бастап, Астана-Қарағанды бағыттары бойынша жолдар барлық көлік түрлері үшін жабылды.
Ақмола облысында 10 желтоқсан, сағат 12:30-дан бастап, Есіл қаласынан Қостанай облысының шекарасына дейін, 10 желтоқсан, сағат 18:00-ден бастап, Шортанды-Астана бағыты бойынша, 11 желтоқсан, сағат 13:45-тен бастап, Астана-Ерейментау-Шідертіден Павлодар облысының шекарасына дейін, сағат 15:20-дан бастап Астана қаласы бағытында Қарағанды облысының шекарасына дейін барлық көлік түрлеріне жол жабық.
Қостанай облысында сағат 18:00-ден бастап ауа райының күрт бұзылуына (бұрқасын, көрініс шектеулі) байланысты Қарағанды облысынан Арқалық қаласына дейін, Ақмола облысының шекарасына дейін барлық көлік түрлері үшін жолдар жабық.
Павлодар облысында сағат 18:00-ден бастап, бұрқасын мен жолдың көрініс аймағының шектеулі болуына байланысты Шідерті ауылынан Ақмола облысының шекарасына дейін барлық көлік түрлеріне жол жабық.