Жылу маусымына – ерекше назар

Премьер-Министр Бақытжан Сағынтаевтың төрағалығымен өткен кешегі Үкімет отырысында негізінен екі мәселе қаралды. Соның біріншісі Үкіметтің заң шығарушылық қызметіне қатысты болды. Осы мәселе бойынша баяндама жасаған Әділет министрі Марат Бекетаев Үкіметтің 2016 жылғы заң шығару жоспарының орындалуы және 2017 жылы қабылданатын заңдар туралы мәлімдеді.  

Заң жобалары қалай әзірленуде?

Министрдің айтуынша, үсті­міздегі жылы 26 заң жобасы қа­былданады деп жоспарланған болатын. Дегенмен, бірқатар елеп-екшеу мен өзгертулерден кейін 10-18 жобаны қарап, іске қосудың сәті түсті. Бүгінгі күнге дейін 3 заңға Мемлекет басшысы қол қойды. 4 заңды Парламент қабылдады. Енді 11 заң жобасы Парламент қа­рауында. Президент Әкімшілігінің келісімі негізінде бірқатар заң жобалары жетілдіру мен толықтыру қажеттіктен жоспардан шығарылды. Бұл заң жобалары жөнінде алдымен халық арасында түсіндіру жұмыстарын жүргізу көзделіп отыр. Сондықтан өкілетті органдарға 7 заң жобасы жөніндегі жұмыстарды 2017 жылға ауыстыру ұсынылады, деді М.Бекетаев. Мұның сыртында жыл ішінде жоспарға қосымша заң жобаларын енгізуге қатысты өзгерістер жасалған. «Мұндай заң жобаларының қатарында «Дене тәрбиесі мен спорт мәселелеріне қатысты кейбір заң актілеріне өзгерістер мен толықтырулар енгізу туралы», «Дактилоскопиялық және гендік тіркеу туралы» заң жобалары бар. Оларды Парламент қарап қабылдады», деді М.Бекетаев. Әділет министрінің айтуына қарағанда, 2017 жылдың жоспарына 28 заң жобасы енгізілген. 10 заң жобасы жылдың бірінші жар­тысында, қалған 18 заң жоба­сы екінші жарты жылдықта қа­был­дануы тиіс. Министр бұл заң жобаларына да қысқаша тоқталып өтті.  

Теміртау түйткілдері

Үкімет қараған екінші мә­селе жылыту маусымына дайын­дық жұмыстарына қатысты болды. Осы мәселе жөнінде бірқатар министрлердің және өңір басшыларының есептері тыңдалды. Алдыңғылар қатарында сөз алған Энергетика министрі Қанат Бозымбаев жылыту мау­сы­мының негізгі мәселелеріне тоқ­талып өтті. «Аталған мәселеге арналып, Үкімет қорынан 1 миллиард 862 миллион теңге бөлінген болатын. Бұл қаржы 1 528 миллион теңгеге 30 364 тонна мазут сатып алуға, 335 миллион теңгеге 92 мың тонна көмір сатып алуға бағытталды. Осының нәтижесінде электр стансаларында 3,3 миллион тонна көмір мен 121 мың тонна мазут қоры жасақталынды. Бұл көрсеткіш өткен жылдың осы мерзіміндегімен сәйкес және қысқы жылыту маусымын сенімді түрде бастауға мүмкіндік береді. Дегенмен, соған қарамастан кейбір өңірлерде аталған маусымды қалыптағыдай өткізу бағытында шешімін күткен мәселелер бар», деп атап көрсетті Энергетика министрі. Оның айтуынша, Семей қала­сында «Жылукоммуэнерго» кәсіп­орнының алдында тұтыну­шы­лардың 354 миллион теңге қарызы қалыптасып отыр. Бұл жағдай жөндеу жұмыстарын жүргізуге едәуір бөгет жасауда. Осының салдарынан кәсіпорынға көмір сатып алу жұмыстары мер­зімінен кешіктіріліп жүргі­зілген. Мазут сатып алу мәселесі әлі ше­шімін тапқан жоқ. Осы себепті оның қоры таусылуға жақын. Қ.Бозымбаев Теміртау қала­сында қалыптасқан жағдайға тоқ­талып өтті. Мұнда материалдардың кешіктіріліп жеткізілуіне бай­ланыс­ты «Арселор Миттал Те­мір­тау» АҚ-қа қарасты ЖЭС-2-дегі №1 қазандық пен №1 трубинаға күрделі жұмыстарын жүргізу үстіміздегі жылдың қазан айының ортасына дейін жалғасса, №2 қазандықты жөндеу 30 қыркүйек пен 25 желтоқсан аралығына белгіленген. Осының салдарынан жылыту маусымы кезінде Теміртау қаласы негізгі құрал-жабдықтардың резервімен дұрыс қамтамасыз етілмеген. Теміртаудағы осы жағдай Үкімет отырысындағы әңгіменің негізгі өзегіне айналды десек те болады. Үкімет басшысы Бақытжан Сағынтаев осы жағдайға ерекше тоқталып, алаңдаушылық танытты. «Жылу маусымы басталғалы бері «Арселор Миттал» ЖЭС-2 қазандығында 17 апатты жағдай орын алған, бүгін таңертең №2 қазандық істен шықты. Мұның сыртында тағы екі қазандық жөндеу жұмыстарына қойылған. Осыдан Теміртаудағы тұрғын үйлердегі жылу 16 градустан аспай тұр. Ауа райы қатты суытқан кездері 12 градусқа дейін төмендеген», деп Үкімет басшысы қаладағы жалпы жағдайды мәлімдей келе, Қарағанды облысының әкімінен жағдайды мәлімдеуді сұрады. «Соңғы үш күнде Теміртауда сіз айтқан жайттардың орын алғаны рас. Бүгін кешке дейін №2 жылу қазандығы қайтадан іске қосылып, нормативтік жұмыс өлшеміне сай болады. Ал №5 қазандық ертең іске қосылады», деп мәлімдеді ол. Үкімет басшысы әкімнің бұл есебіне оншама қанағаттана қойған жоқ. Осыған орай Теміртауда қашаннан бастап жағдай түзетіліп, жылудың дұрыс берілетіндігін нақты сұрады. Нұрмұхамед Әбдібеков жылу берудің 30 желтоқсаннан бастап қалыпты жағдайға түсетіндігін айтып уәдесін берді. Жалпы, жылыту маусымы басталғаннан бері басқа да бірқатар өңірлерде апат деп айтпасақ та, жергілікті тұрғындарға қо­лай­сыздық келтіргендей жағдай­лардың орын алғандығы сөз болды. Сондай-ақ, кейбір өңір­лерде дайындықтың сылбыр жүр­гендігі анықталды. Қанат Бозым­баев өз баяндамасында осы мәселелерге де тоқталып өтті. «Әлеуметтік мазуттың жеткізілуі туралы бірер сөз айта кеткім келеді. Әкімдіктерден берілген тапсырыстарға сәйкес, Энергетика министрлігі ағымдағы күзгі-қысқы жылыту маусымына дайындық жүргізу үшін әлеуметтік өндірістік жұмыстарға арнап 342 мың тонна мазут жеткізудің кестесін жасады. Өкінішке орай, қараша айында бұл жұмыс 59 пайызға, желтоқсан айында 26 пайызға ғана орындалды. Жоспардағы 83 мың тоннаның орнына 28 мың тонна мазутқа ғана ақша төленді. Оның 21 мың тоннасы жөнелтілді», дей келе бұл жұмыстардың Ақмола, Ал­маты, Жамбыл, Қостанай, Шығыс Қазақстан, Оңтүстік Қа­зақстан облыстарында және Ал­маты мен Астана қалаларында сыл­быр жүріп жатқандығын атап өтті.  

Әкімдер дербес  жауап береді

Отырысты қорытындылаған Үкімет басшысы Бақытжан Са­ғын­таев жылу маусымының дұрыс жүруіне әкімдер дербес жауап беретіндігін қатаң ескертті. «Біз бұл мәселе жайында үнемі айтып келеміз. Сіздердің есептеріңізді тыңдап отырамыз. Дегенмен, жылу желілерінде әртүрлі апатты жағдайлар орын алып жатады. Енді, ең бастысы, Жаңа жыл мерекесі кезінде осындай оқиғалардың орын алмауын қатаң ескертеміз. Халықтың мерекелік көңіл-күйіне қаяу түсіріп жүр­мейік», деді Үкімет басшысы. Осыған орай бірқатар министр­ліктерге тиісті тапсырмалар бе­рілді. Мереке кезінде қоғамдық ты­ныштықтың дұрыс сақталуы, барлық қызметтердің дұрыс жүр­гізілуі, жол тазалығына жеткілікті мән берілуі, барлық мемлекеттік органдар кезекшілік жұмыстарын мүлтіксіз атқаруы қажеттігін атап көрсетті. Премьер-Министр үстіміздегі жылғы Үкімет жұмысына да қыс­қаша қорытынды жасап өтті. «Он бір айдың қорытындысын біз өткендегі отырыста жасаған болатынбыз. Жыл қорытындысын қаңтар айының басында Үкіметтің кезекті отырысында жасаймыз. Жал­пы, жұмыс көрсеткіштері мен өл­шемдері жайында айтылды. Мем­лекет басшысы біздің алды­мызға қойған тапсырмаларды толық орындауға қол жеткізе ал­дық. Осы үшін Үкімет мүшелері мен әкімдерге бірлесіп атқарған жұмысымыз үшін алғысымды білдіремін», деді Бақытжан Сағынтаев. Сұңғат ӘЛІПБАЙ, «Егемен Қазақстан»