Мұнай өндірудің жылдық көлемі 81 млн. тоннаға дейін ұлғайтылады. Бұл туралы бүгін Үкімет отырысында ҚР Энергетика министрі Қанат Бозымбаев мәлімдеді.
«Бірінші жартыжылдыққа арналған жоспарға Энергетика министрлігінің 10 іс-шарасы енгізілді. Бұл тұрғыда мұнай-газ саласының дамуы үшін қажетті шаралар қамтылды. Біріншіден, мұнай өндірудің нақты көлемі индексін 103,8 пайызға жеткізу үшін мұнай өндірудің жылдық көлемі 81 млн. тоннаға дейін ұлғайтылады. Бұл ретте Қашағаннан - 5 млн. тонна, Теңіз кен орнынан - 27,5 млн. тонна, сондай-ақ Қарашығанақ кен орнынан 11,8 млн. тонна мұнай өндірілмек. Жартыжылдықта 40,7 млн. Тонна мұнай өндіру жоспарланып отыр. Ал мұнайдың экспорты 65 млн. тоннаны құрайды», - деді Бозымбаев.
Оның сөзіне қарағанда, газ өндірудің физикалық индексі 103, 6 пайызға жету үшін газ өндірудің жылдық көлемі 48, 1 млрд. текше метрге дейін ұлғайтылатын болады. Осы орайда Қашағаннан - 3,1 млрд. текше метр, Теңізден- 14,4 млрд. текше метр, Қарашығанақтан -18 млрд. текше метр газ қамтамасыз етіледі. Жалпы, бірінші жартыжылдықта 24,5 млрд. текше метр газ өндіру жоспарға енгізілді. Белгілі болғандай, экспорт көлемі 13, 7 млрд. текше метрге жеткізілмек.