Қазақстан Президентінің биылғы Жолдауын талқылау, мемлекеттік биліктің тармақтары арасында өкілеттіліктерді қайта бөлу, жастардың өткір мәселелерін ортаға салу – осы кездесудің басты тақырыбы болды.
Мәжіліс депутаты Бақтияр Мәкен облыста осыған дейін жұмысшылармен, зиялы қауым өкілдерімен, студенттермен болған кездесулерден алған әсерін баяндады.
– Жастармен жүздесуге мен әрқашан асығып тұрамын. Бүгін Жәңгір хан атындағы аграрлық университет студенттерімен кездестік. Өте орынды, ұтымды ұсыныстар айтылды. «Болашақ» қауымдастығының осы өңірдегі бөлімшесіне де дән ризамын. Әрдайым ұйымшыл, ел тағдыры шешілетін мәселелерге сергек қарап, бастамаға үн қосып отырады. Оның үстіне Батыс Қазақстан облысын басқарып отырған Алтай Көлгінов те «Болашақ» бағдарламасының түлегі ғой. Сондықтан, бұл өңірде жастар пікіріне, жастар мәселесіне ерекше көңіл бөлінеді, – деді депутат.
Бақтияр Мәкен Конституцияға енгізілетін өзгерістер, билік бөлінісі секілді тақырыптарға жергілікті жастардың көзқарасын білу депутаттар үшін өте маңызды екенін мәлімдеп, бұрын елімізде болған «Жастар Парламенті» жобасы қайта жанданатынын айтты. Жастар Парламентіне саяси көзқарасы қалыптасқан көшбасшы жастар іріктеліп алынбақ. Олар жалаң ұранмен жұмыс істемей, заң тетіктеріне қатысты нақты ұсыныстар айта алатындай күш болуы тиіс. Жобаға өңірдегі «Болашақ» түлектері көбірек тартылмақ.
Кездесуде Ақжайық өңірінде қызмет етіп жүрген болашақтық мамандар, жастар серкелері ашық-жарқын ой бөлісіп, көптеген ұсынысты ортаға салды.
«Болашақ» қауымдастығы БҚО бойынша филиалының жетекшісі Салтанат Түменбаеваның айтуынша, бүгінде өңірде «Болашақ» бағдарламасының 140-тан аса түлегі әртүрлі салада еңбек етіп жүр.
Қазбек ҚҰТТЫМҰРАТҰЛЫ, «Егемен Қазақстан»
ОРАЛ