Таяуда Венеция қаласында Еуропа Кеңесінің «Құқық арқылы демократия үшін» Еуропалық комиссиясының (Венеция Комиссиясы) 110-жалпы сессиясы өтті. Сессияның күн тәртібіне «Қазақстан Республикасының Конституциясына өзгерістер мен толықтырулар енгізу туралы» Қазақстан Республикасының Заңы бойынша Комиссияның қорытындысын жариялау туралы мәселе енгізілді.
Сессия жұмысына Қазақстан Республикасы Президентінің Әкімшілігі Басшысының орынбасары Т.Донақов, Конституциялық Кеңестің төрағасы И.Рогов және Қазақстан заңгерлері одағының төрағасы Р.Мұқашев қатысты.
Аталған қорытындының жобасын дайындау үшін Комиссия Арменияның, Болгарияның, Грузияның, Латвияның, Ресейдің және Түркияның танымал мамандарын шақырды. Сарапшылардың, Комиссия мүшелерінің және Қазақстан өкілдерінің пікірін тыңдау нәтижесінде Комиссия Қазақстандағы конституциялық өзгерістер мемлекетті демократияландыру процесіндегі алға басылған қадам деп атап өтілген тұжырымдаманы қабылдады. Бұл реформа елдің одан әрі дамуының оң бағытын көрсетіп, нақты прогресті дәлелдейді.
Комиссияның пікірі бойынша, Парламенттің және Парламент палаталарының рөлін көтеру, республика Президентінің кейбір функцияларын Үкіметке беру, оның Парламентке есеп беруі және бақылауында болуы тетіктерін күшейту оң өзгеріс болып табылады және бұдан бұрын, 1998, 2007 жылдары өткізілген конституциялық реформалардың бағытына сай келеді. Оған қоса, Комиссия «Әкімшілік рәсімдер туралы» Қазақстан Республикасы Заңының жобасы бойынша да қорытынды беріп, Қазақстан Республикасы Судьялық әдеп кодексінің жобасы бойынша іске қанағаттанушылық білдірді, деп хабарлады Конституциялық Кеңестің баспасөз қызметі.