Парламент Сенатының депутаты Дариға Назарбаеваның төрайымдығымен Республикалық конкурстық комиссияның мемлекеттік 6 жоғары оқу орнының ректорларын сайлау жөніндегі отырысы болды, деп хабарлады Сенаттың баспасөз қызметі.
Олар Қ.Жұбанов атындағы Ақтөбе өңірлік мемлекеттік университеті, Қарағанды мемлекеттік индустриялық университеті, Ш.Есенов атындағы Каспий мемлекеттік технология және инжиниринг университеті, М.Қозыбаев атындағы Солтүстік Қазақстан мемлекеттік университеті, Тараз мемлекеттік педагогикалық институты және М.Х.Дулати атындағы Тараз мемлекеттік университеті.
Республикалық конкурстық комиссиясының қарауына осы 6 жоғары оқу орнының байқаушылар кеңесі ұсынған, конкурсқа өтініш берген 45 адамның 11-і ұсынылды.
Үміткерлермен әңгімелесу және олардың жоғары оқу орындарын дамыту жөніндегі бағдарламаларын талқылау қорытындысы бойынша Қ.Жұбанов атындағы Ақтөбе өңірлік мемлекеттік университетіне Бауыржан Ердембековті, Қарағанды мемлекеттік индустриялық университетіне Бақыт Жәутіковті, М.Қозыбаев атындағы Солтүстік Қазақстан мемлекеттік университетіне Серік Өмірбаевты, Тараз мемлекеттік педагогикалық институтына Дариякүл Қожамжарованы ректор етіп тағайындау ұсынылды.
Ш.Есенов атындағы Каспий мемлекеттік технология және инжиниринг университеті мен М.Х.Дулати атындағы Тараз мемлекеттік университеті бойынша конкурс өтпеген болып саналды, Білім және ғылым министрлігіне конкурсты қайта өткізу жөнінде ұсыныс айтылды.
Ректорлардың сайлануы мен есептілігі қағидасының енгізілуі жоғары оқу орындарының академиялық және басқару дербестігін кезең-кезеңмен ұлғайту аясындағы «100 нақты қадам» Ұлт жоспарының 78-қадамына сәйкес келеді.