Өңіраралық ынтымақтастықты нығайту аймақтар арасында бәсекелестікті дамытып қана қоймай, өз кезегінде тауар өндірушілердің де тәжірибе алмасуына мол мүмкіндік туғызады. Әрі өндірілген тауарларды қолжетімді бағамен халық игілігіне ұсыну да екіжақты экономикалық, әлеуметтік байланыстарды нығайтып, қалыптастырады.
Осы мақсатта таяуда Жамбыл облысынан азық-түлік тиелген автокеруен Ақтөбе қаласына жол тартты. Жамбылдық тауар өндірушілер өз өнімдерін 18-19 наурыз күндері арнайы ұйымдастырылған жәрмеңкеде Ақтөбе халқына саудалайтын болады.
Ауылшаруашылық жәрмеңкесінде жалпы құны 105,5 миллион теңгені құрайтын 177 тоннадан астам ауылшаруашылық тауарлары ұсынылады. Оның ішінде 25 тоннаға жуық жылқы, тауық, шошқа еті өнімдері, 10 тонна шұжық өнімдері, 13 тонна сүт өнімдері, 5 мың дана жұмыртқа, 1,5 тонна кондитерлік өнімдер мен 6 тонна макарон өнімдері, сондай-ақ, 10 тонна қант, 0,5 тонна тұз, 7 тонна балық, 2 тонна бал және 80 тонна жеміс-жидек пен көкөніс өнімдері бар. Жәрмеңкеде ұсынылатын тауар бағалары нарық бағасынан 8-20 пайызға төмен болады деп жоспарланып отыр. Бұл да тұрғындар арасында қолжетімділікті арттырып, баға тұрақтылығын сақтауға оң әсерін тигізетіні сөзсіз.
Хамит ЕСАМАН,
«Егемен Қазақстан»
Жамбыл облысы