Халқымыздың бостандыққа ұмтылысының және қайсар рухының арқасында ата-бабамыздың ғасырларға созылған арманы – Тәуелсіздікке қол жеткіздік. Демек, Тәуелсіздікті қалай ұлықтасақ та, оған қатысты қандай құжат қабылдасақ та еш артықшылығы жоқ. Осы бір қасиетті сөзді күніне неше қайтара айтсақ та, оның құны бір мысқал да төмендемек емес. Тәуелсіздік деген сөзге біздің мейіріміміз ешқашан қанбайды да.
Парламенттің Тәуелсіздік Декларациясын қабылдағанын халқымыздың арманын, ойын дөп басып таба алғаны деп бағалаймын. Осылайша жаңа тұрпатты Қазақстанның, әлемге танылып, өз орнын белгілеген алып әрі асқақ еліміздің қадір-қасиетін келешек ұрпақтың санасына сіңіріп, отаншыл рухын ұштай түсетін боламыз. Бұл құжат бүгін де, ертең де өз маңызын, қажеттілігін жоймайды. Барша қазақстандықтар үшін белгіленген Тәуелсіздік күнінің бейбітшіліктің, татулықтың, бірліктің мерекесіне айналып кеткенінің өзі бұл атаудың қаншалықты маңызды екенін байқатады.
Қазақстанның жаңа дәуірінің шымылдығын ашқан Тәуелсіздік Президентіміздің есімімен де, еңбегімен де тығыз байланысты. Сөз жоқ, тәубе етер тәуелсіз еліміздің көшін алға сүйреуде Елбасының еңбегі ұшан-теңіз.
Тәуелсіздікті алға сүйрейтін күштер бар, ең алдымен, ол – халқымыз. Тәуелсіздік халықтың ақылымен, қуатымен нығайды. Халықтың ауызбіршілігі мен ынтымағының арқасында көркейді. Ал осы тәуелсіздікті бекемдеген – Президентіміз Нұрсұлтан Назарбаевтың көрегендігі мен кемел мінезі. Осындай тарихи жауапты сәтте табандылықпен еңбегін сіңіріп, Елбасының міндеттеген жоспарлары мен мемлекеттік маңызды бағдарламаларды, жобаларды жүзеге асыруға жәрдемші болған – Президент сенім артып, ел жүгін көтеруге тағайындаған азаматтар. Осы үш күштің бірлігі, үштаған одақтың ымыраластығы – халықтың, Президенттің және биліктің бірін бірі қолдауы Тәуелсіздік әлеуетін арттыра түспек.
Хангелді ӘБЖАНОВ,
тарих ғылымдарының докторы, профессор, Ш.Уәлиханов атындағы Тарих және этнология институтының директоры
АЛМАТЫ