Бүгін Ақтөбе облыстық қылмыстық істер жөніндегі мамандандырылған ауданаралық сотында осы жылдың 5 маусымындағы теракт бойынша айыптыларға үкім шығарылды.
Үкім бойынша 7 адам өмір бойы бас бостандығынан айырылып, ерекше режімде жазасын өтейді.
Бұдан бөлек, сот негізгі айыпталушылар Жұбанов Айдос пен Абдрахманов Азаматты 22 және 20 жылға ерекше режімде өтеуге кесті. Қолға түскен 29 күдіктінің ішінде 9-ы – басты айыпталушылар. Оларға бірқатар қылмыстар бойынша, оның ішінде теракт жасады деген айып тағылып отыр. Қылмыскерлердің мүлкі тәркіленіп, жазасын ерекше режімде өтейді. Қалған 18-не қылмыс туралы құзырлы органдарға хабарламау (ҚР ҚК 434 бабы), 2-еуіне қылмысты жасыру әрекеттері (ҚР ҚК 432 бабы) бойынша айып тағылды.
Сонымен қатар, Ақтөбеде 2016 жылдың 5 маусымы күні болған террористік актіге қатысқан Абдрахманов пен өзге де азаматтардың қылмыстық істері бойынша, сот 21 қараша күні айыпталушылардың соңғы сөздерін естіді. Бірқатар қылмыстар жасаған, соның ішінде террористік акт ұйымдастырды деп сотталғандар мен айып тағылған азаматтар істеген әрекеттеріне өкінетіндерін айтып, сот өкілдеріне өмір бойына қамауға алу туралы үкім шығармау жөнінде өтініш жасаған.
Айта кетейік, лаңкестер «Паллада» және «Пантера» қару-жарақ дүкендері мен №6655 әскери бөліміне шабуыл жасады. Салдарынан 8 адам қаза тапты. Олардың 3-еуі – әскери қызметкер.