Осы кездесу шеңберінде ел Президенті Н.Ә.Назарбаевтың бағдарламалық мақаласының негізгі идеологиялық бағыттарын талқылап, рухани жаңғыру және Қазақстан халқының алдағы уақыттағы мәдениетінің дамуы туралы келелі ойлар айтылды. Академик, философия ғылымдарының докторы, профессор Ә.Нысанбаев «Мәдени мұра» бағдарламасы аясында шыққан әлемдік философия еңбектерінің маңыздылығына тоқталып, сонымен қоса қазақ философиясын да алдыңғы қатарлы зерттеу еңбектеріне енгізіп, өз дәрежесінде зерттеу керектігін айтты. Философия, саясаттану және дінтану институты директорының міндетін атқарушы, философия ғылымдарының докторы, профессор С.Нұрмұратов, әл-Фараби атындағы ҚазҰУ-дың философия және саясаттану факультетінің профессоры, философия ғылымдарының докторы Т. Ғабитов, филология ғылымдарының кандидаты, доцент Т. Әлібек сөз сөйлеп, Елбасы мақаласындағы ғылым, білімге қатысты тармақтарды жан-жақты саралап, асықпай шешім шығаруды ұсынды.
Қазіргі кезде қазақ ғылымы, философиясы қарқынды зерттеулерді қажет етеді. Тоқтап қалмаса да, толық, түбегейлі зерттеулер жүргізілмегендіктен, әлем тілдеріне аударылар қазақ кітаптарын да ұзақ талқыдан өткізуге тура келеді. Ал әлемге ұсынар қазақ руханиятында шын мәнінде лайықты шығармалар көп-ақ. Ол мейлі халық ауыз әдебиеті үлгілерінен болсын, авторлар шығармашылығынан болсын, солай айтуға әбден болады. «Мәдени мұра» бағдарламасы аясында шығарылған жүз томдықтың бәрі университет кітапханаларына түскен. Бұл мемлекет тарапынан жасалған үлкен көмек, ғалымдардың еңбегі. Әлем философиясының жүз томдығын аударған ғалымдардың еңбектерін де жоққа шығаруға болмайды. Бірақ сол аударылған жүз томдықтың бәрі өз деңгейінде кәсіби түрде аударылмағаны анық. Елбасының бағдарламалық мақаласындағы тапсырмалары науқанға айналып кетпей, нақты үздік шығармалар ұсынылып, тыңғылықты жұмыстар істелуі тиіс. Ешқандай көзбояушылық әрекеттің орын алмауы қазіргі күні басты назарда. Бұл «Жаңа 100 есімге» де, алты тілге аударылатын қазақ шығармалары мен қазақша аударылатын шетел кітаптарына да қатысты мәселе. Ғалымдар ұсыныстарын министрлікке жолдап, әртүрлі бас қосулар мен жиындарда өз ойларын ортаға салып, Елбасы мақаласындағы тапсырмаларға атсалысатындарын білдірді.
Бағашар ТҰРСЫНБАЙҰЛЫ, «Егемен Қазақстан»
АЛМАТЫ