2026 жылдың алғашқы тоқсанында Қазақстанда шикізаттық емес сектордың дамуы қарқын алып, өңдеу өнеркәсібі айтарлықтай өсім көрсетті. Үкімет отырысында мәлім болғандай, өңдеу өнеркәсібінің өсімі 8,5%-ды құрады, деп жазады Egemen.kz.
Бұл туралы баяндаған Ерсайын Нағаспаев аталған нәтижеге бірқатар саланың серпінді дамуы ықпал еткенін жеткізді. Атап айтқанда, машина жасау, құрылыс материалдарын өндіру және жеңіл өнеркәсіп негізгі драйверлерге айналды.
Қазақстан экономикасы 3%-ға өсті
Индустриялық өсіммен қатар құрылыс саласында да оң динамика байқалады. Үш айдың қорытындысы бойынша орындалған құрылыс жұмыстарының көлемі 1,2 трлн теңгеге жетіп отыр, бұл өткен жылдың осы кезеңімен салыстырғанда 14,8%-ға жоғары. Сонымен бірге 3,9 млн шаршы метр тұрғын үй пайдалануға берілді.
«1 тоқсанның қорытындысы бойынша өңдеуші өнеркәсіптің негізгі секторларында жиынтық көрсеткіші 8,5% болатын оң динамика байқалады. Өндіріс көрсеткіштері машина жасауда, химия өнімдерін, құрылыс материалдарын, резеңке және пластмасса бұйымдарын өндіруде, жеңіл өнеркәсіпте және өңдеу өнеркәсібінің басқа да салаларында өсті. Машина жасау саласындағы өндіріс көлемі көлік құралдары, ауыл шаруашылығы және теміржол техникасы өндірісінің өсуі есебінен 21,9%-ға ұлғайды», деді Ерсайын Нағаспаев.
Жалпы, өңдеу өнеркәсібіндегі тұрақты өсім экономиканы әртараптандыруға негіз болып, елдің өндірістік әлеуетін күшейтуге үлес қосып отыр.
І тоқсандағы экономикалық өсімді өңдеу, құрылыс, көлік және сауда салалары қамтамасыз етті