Облыстық Төтенше жағдайлар жөніндегі департамент өкілдері өткізген брифингте жоғарыдай мысалдар келтіріліп, айтып келмес ажалдың себеп-салдарларына талдау жасалды. Департамент бастығының орынбасары Ерік Сарыбаевтың айтуынша, адам өліміне жетелейтін қасірет, ең алдымен, жеке бас қауіпсіздігіне немқұрайды қараудан туындайтын көрінеді. Әсіресе, мас күйінде суға түсу оқиғалары азаймай тұр. Ол бүкіл өлім-жітімнің 70 пайызын құрайтын болса, ата-аналардың балаларды қараусыз қалдырып кетуінен болатын қайғылы жағдайлар 10 пайыз төңірегінде. Өмірмен мезгілсіз қош айтысқандардың 65 пайызы 18 бен 58 жас аралығындағылар. Өңірде 2390 өзен, көл, тағы басқа тоғандар барын, олардың 231-і шаруашылық мақсаттарға қолданылатынын, 51 жерде жұртшылықтың жазғы демалыс орындары, 17 сауықтыру лагерьлері ұйымдастырылғанын ескерсек, сақтық жұмыстарын күшейту, оны кешенді түрде жүргізу аса маңызды екені брифингте атап көрсетілді. Осыған орай тұрғындардың жаз күндерін еш алаңсыз өткізуін қамтамасыз етуге жүзге жуық құтқару құралдары мен сүңгуірлер жұмылдырылған. Жедел-құтқару отрядтары күні бойы кезекшілік етіп, аса қауіпті аймақтарды ұдайы бақылайды. Суға түсу ережелерін түсіндірумен жүйелі айналысады.
Өмір ЕСҚАЛИ, «Егемен Қазақстан»
Солтүстік Қазақстан облысы