Былтыр ақпан айында Тбилисиден велосипедпен ұзақ сапарға аттанған саяхатшы 850 күннің ішінде 50 елдің шекарасын басып өтіп, 50 мың шақырымды артқа тастапты. Күніне 100 шақырым қашықтықты еркін еңсеріп отырған оның ендігі ойы – Гиннестің рекордтар кітабына ену. Рекордтар кітабын 14 рет жаңартқан қандасы Джумбер Лежаваның 264 мың шақырым қашықтықты бағындырғанын, көп жыл бойы оның менеджері болғанын мақтан етеді. «Әлем жолы» атты құрлықаралық саяхат маршрутын бүгінде өзі жалғастырып, ұстаз аманатын адал орындап келеді. Аяқ суытып, дамылдаған сәттерде сол елдің, халықтың тарихын, мәдениетін, салт-дәстүрлерін білмекке құмар. Қай жағынан болсын Қазақстаннан үйренетін тағылым, көкірекке түйетін оралымды ойлар көп дейді ол. Алдағы бағыты – Ресейдің Омбы, Қорған, Түмен облыстары. Оны алда ұзақ жолсапар күтіп тұр. Ол 2018 жылы ғана туған жерімен, отбасымен қауышатын көрінеді. Қазақстан жайлы жылы ұғымды жүрегіне ұялатқан жиһанкезге сәт сапар тілейік.
Өмір ЕСҚАЛИ, «Егемен Қазақстан»
Солтүстік Қазақстан облысы