БҰҰ Қауіпсіздік Кеңесінің аясында өткен аталған басқосуда мемлекеттік емес құрылымдардың жаппай қырып-жоятын қарулармен шабуылдау қаупі жан-жақты сөз болды. Осы орайда жиынға қатысушылар мемлекеттер тарапынан қолға алынған шараларға қарамастан, лаңкестік топтардың ядролық, химиялық және биологиялық қаруларды қолдану қаупі күн сайын артып келе жатқанын бірауыздан атап өтті. БҰҰ-ның Қарусыздану мәселелері бойынша Жоғарғы Комиссары Идзуми Накамицудың сөзіне қарағанда, мемлекеттік емес заңсыз құрылымдар өздеріне қажетті жабдықтар мен материалдарды сатып алуда баламалы интернет порталдары, ұшқышсыз ұшу аппараттары, үш өлшемді принтерлер секілді озық технологиялардың көмегін пайдалануда. Өз кезегінде еліміздің БҰҰ-дағы Тұрақты өкілі Қайрат Омаров Қазақстан тарапы ғылым мен техника саласында жасалып жатқан адамзатқа қауіп төндіруі ықтимал жаңалықтарды бақылауға алу мәселесіне тоқталды. Осы орайда ол Мемлекет басшысы Нұрсұлтан Назарбаевтың жаппай қырып-жоятын қару жасау және жетілдіру үшін пайдаланылуы мүмкін ғылыми жаңалықтардың Тіркеу реестрін түзу қажеттігі туралы бастамасын еске салды. Өзінің қорытынды сөзінде Қ.Омаров жаппай қырып-жоятын қарулардан құтылу мақсатында әлемдік қоғамдастықтың заман талабына сай күш біріктіруі маңызды екеніне назар аударды. Жиында қатысушылар жаһанды алаңдатып отырған бұл мәселенің маңыздылығын, бұл орайда кешенді шаралар қабылдау қажеттігін атап көрсетті.
Әлем
•
05 Шілде, 2017
БҰҰ: Жаппай қырып-жою қаруларын таратпау мәселесі қаралды
608 рет
көрсетілді
БҰҰ Қауіпсіздік Кеңесінде жаппай қырып-жою қаруларын таратпау мәселесіне арналған жиын болды. Ұйымның Нью-Йорк қаласындағы штаб-пәтерінде ұйымдастырылған бұл шара ашық пікірталас пішімінде өтті, деп хабарлады Қазақстанның БҰҰ жанындағы Тұрақты өкілдігі.