Алматы облысындағы Алакөл жағалауында дуатлон жарысы басталды. Алғаш рет ұйымдастырылған шараға Мəдениет және спорт министрі Арыстанбек Мұхамедиұлы, Сидней Олимпиадасының жеңімпазы Ермахан Ыбрайымов, Рио-де-Жанейро Олимпиадасының күміс медаль иегері Әділбек Ниязымбетов, әнші Жеңіс Сейдолла сынды бірқатар азаматтар арнайы келді.
Жарысқа халықаралық дәрежедегі төреші Юрий Портнягин қазылық етуде. «Алакөл - 2017» облыстық жарысқа 70-ке жуық адам қатысып жатыр. Олар жас ерекшеліктеріне байланысты үш санат бойынша марапатталады. Қатысушылар жалпы 14 шақырым жолды жүгіріп және велосипедпен жүріп өтеді. Мәселен, 2 шақырымды - жаяу, 10 шақырымды - велосипедпен, одан кейін тағы 2 шақырымды жаяу еңсереді. Спорттық додаға қатысушылардың ең жасы 16 жаста болса, ең үлкені 60-қа таяп қалған. ҚР Мәдениет және спорт министрі Арыстанбек Мұхамедиұлы да шараға өз үлесін қосып - спортшылармен бірге жарысқа қатысып жатыр. Эстрада жұлдыздары ән шырқап, кештің көркін қыздыруда.